Farg‘ona viloyati Uchko‘prik tumanida ota-bolani ichki ishlar xodimlari kaltaklagani haqida xabarlar tarqaldi. Viloyat IIB holat yuzasidan bayonot berdi.
Aniqlanishicha, joriy yilning 4-mart kuni Uchko‘prik tumani IIB xodimi M.E. Jinoyat kodeksining 104-moddasi 2-qismida ko‘rsatilgan jinoyatni sodir etgani uchun sud tomonidan ozodlikni cheklash jazosi tayinlangan Katta Kenagas qishlog‘ida yashovchi, 1999-yilda tug‘ilgan mahkum M.A.ning tunda cheklovga amal qilayotganini IIVning tegishli buyruq talablari asosida tekshirish uchun xolislar ishtirokida soat 23:00 da uyi yoniga borib, uyida ekani sababli profilaktik suhbat o‘tkazgan.
Biroq mast holda bo‘lgan fuqaro M.A. IIO xodimining harakatidan norozi bo‘lib, shu kuni soat 23:30 larda otasi X.J. bilan birga tuman IIBga o‘zlari kelgan (IIO xodimlari ularni chaqirtirmagan). Asossiz ravishda uni uyiga kelib profilaktik suhbat o‘tkazgan xodim M.E.ni mast holatda xizmat olib bormoqda deb, ichki ishlar binosiga belgilangan qoidalarga amal qilmasdan kirmoqchi bo‘lgan.
Shunda ma’muriy binoning nazorat-o‘tish joyida xizmat olib borayotgan IIO xodimi E.A. tomonidan belgilangan tartib-qoidalarga amal qilishi kerakligi tushuntirilgan. Qonuniy talabga bo‘ysunmasdan, asossiz ravishda baqir-chaqir qilishib, haqoratli so‘zlar ishlatishib, xodimga tashlanishgan vaqtda, ularning noqonuniy xatti-harakatlari IIO to‘g‘risidagi qonun va me’yoriy buyruq talablari asosida to‘xtatilib, holat bo‘yicha hujjatlar rasmiylashtirilgan.
Ammo ushbu fuqarolar IIO xodimlari ularni urib, tan jarohati yetkazgani haqida tuman tibbiyot bo‘limiga murojaat qilgan. Hozirda Uchko‘prik tumani prokuraturasi tomonidan tergovga qadar tekshiruv harakatlari olib borilmoqda.
Ma’lumot o‘rnida: Narkologiya dispanserining shu kungi ma’lumotnomasida xodim M.E.da alkogoldan mastlik holati aniqlanmagan.
Izoh (0)