Shveysariyaliklar 3-mart kuni bo‘lib o‘tgan referendumda pensiya to‘lovlarini 13-oylik to‘lov orqali oshirishga ovoz berdi. Bu haqda Deutsche Welle xabar berdi.
Hukumat eʼlon qilgan dastlabki rasmiy natijalarga ko‘ra, saylovchilarning 58 foizidan ortig‘i ushbu chorani qo‘llab-quvvatlagan, 42 foizidan kamrog‘i esa qarshi chiqqan. Tashabbus, shuningdek, Shveysariya 26 kantonining aksarida g‘olib kelgan. Ayni paytda Shveysariyada pensiya to‘lovlari jismoniy shaxslar uchun oyiga 2450 Shveysariya franki (2 767,74 AQSH dollari) va er-xotinlar uchun oyiga 3675 Shveysariya franki (4 151,6 AQSH dollari) bilan chegaralangan.
Biroq iqtisodchilarning taʼkidlashicha, bu to‘lovlar dunyodagi eng qimmat davlatlardan birida har doim ham yetarli emas. Noyabr oyida Economist Intelligence Unit Syurixni Singapur bilan taqqoslab, uni dunyodagi eng qimmat shahar deb topgan.
Hukumat taklif etilayotgan o‘sish yiliga 4 milliard Shveysariya frankidan ko‘proqqa tushishi va yuqori soliqlarni talab qilishini aytgan. Shuningdek, to‘lov barcha nafaqaxo‘rlarga, ularning moliyaviy ahvolidan qatʼi nazar, taʼsir qilishi taʼkidlangan.
Agar tashabbus qabul qilinsa, garchi aslida bunga muhtoj bo‘lmasalar ham, ko‘plab nafaqaxo‘rlar 13-ijtimoiy to‘lovni oladilar, — deya ogohlantirgan hukumat.
“Pensiyada hayotni yaxshilash” taklifi kasaba uyushmalari tomonidan yashash narxining oshib borayotganiga qarshi kurashish uchun ilgari surilgan. Ular nafaqaxo‘rlarni har yili Shveysariya va boshqa Yevropa mamlakatlarida ko‘plab ishchilar oladigan 13-oylik bonusga o‘xshash qo‘shimcha oylik to‘lovni olishga chaqirgan.
Izoh (0)