Швейцарияликлар 3 март куни бўлиб ўтган референдумда пенсия тўловларини 13-ойлик тўлов орқали оширишга овоз берди. Бу ҳақда Deutsche Welle хабар берди.
Ҳукумат эълон қилган дастлабки расмий натижаларга кўра, сайловчиларнинг 58 фоизидан ортиғи ушбу чорани қўллаб-қувватлаган, 42 фоизидан камроғи эса қарши чиққан. Ташаббус, шунингдек, Швейцария 26 кантонининг аксарида ғолиб келган. Айни пайтда Швейцарияда пенсия тўловлари жисмоний шахслар учун ойига 2450 Швейцария франки (2 767,74 АҚШ доллари) ва эр-хотинлар учун ойига 3675 Швейцария франки (4 151,6 АҚШ доллари) билан чегараланган.
Бироқ иқтисодчиларнинг таъкидлашича, бу тўловлар дунёдаги энг қиммат давлатлардан бирида ҳар доим ҳам етарли эмас. Ноябрь ойида Economist Intelligence Unit Цюрихни Сингапур билан таққослаб, уни дунёдаги энг қиммат шаҳар деб топган.
Ҳукумат таклиф этилаётган ўсиш йилига 4 миллиард Швейцария франкидан кўпроққа тушиши ва юқори солиқларни талаб қилишини айтган. Шунингдек, тўлов барча нафақахўрларга, уларнинг молиявий аҳволидан қатъи назар, таъсир қилиши таъкидланган.
Агар ташаббус қабул қилинса, гарчи аслида бунга муҳтож бўлмасалар ҳам, кўплаб нафақахўрлар 13-ижтимоий тўловни оладилар, — дея огоҳлантирган ҳукумат.
“Пенсияда ҳаётни яхшилаш” таклифи касаба уюшмалари томонидан яшаш нархининг ошиб бораётганига қарши курашиш учун илгари сурилган. Улар нафақахўрларни ҳар йили Швейцария ва бошқа Европа мамлакатларида кўплаб ишчилар оладиган 13-ойлик бонусга ўхшаш қўшимча ойлик тўловни олишга чақирган.
Изоҳ (0)