Farg‘ona viloyati O‘zbekiston tumanida o‘zganing YouTube’dagi akkauntini boshqarish huquqini noqonuniy ravishda qo‘lga kiritgan shaxs ushlandi. Bu haqda IIV Kiberxavfsizlik markazi xabar berdi.
Qayd etilishicha, Qo‘qon tumanida yashovchi 20 yoshli G‘.A. murojaat qilib, Telegram messenjerida nomaʼlum shaxs tomonidan 2,5 million so‘m miqdoridagi pul mablag‘lari firibgarlik yo‘li bilan o‘zlashtirilganini maʼlum qilgan.
Tezkor-qidiruv xizmati Kiberxavfsizlik bo‘linmalari tomonidan o‘tkazilgan tezkor-qidiruv tadbirlari natijasida, ushbu jinoyatni O‘zbekiston tumanida yashovchi 17 yoshli T.M. sodir etgani aniqlangan.
Unga ko‘ra, T.M., G‘.A. bilan Telegram’da tanishib, uning YouTube videoxostingidagi akkauntini 2,5 million so‘mga sotib olishini aytgan. U akkauntni boshqarish imkoniyatini qo‘lga kiritgandan so‘ng login va parolni o‘zgartirib, G‘.A. bilan yozishmalarni o‘chirib yuborgan va uni qora ro‘yxatga kiritib qo‘ygan.
Mazkur holat yuzasidan Jinoyat kodeksining 168-moddasi (firibgarlik) 3-qismi “b, g” bilan jinoyat ishi qo‘zg‘atilib, T.M.ning sodir etilib fosh etilmay qolgan boshqa shu turdagi jinoyatlarga aloqadorligini tekshirish yuzasidan tezkor-surishtiruv ishlari olib borilmoqda.
Avvalroq Samarqandda PUBG akkauntini 17 mln so‘mga sotishini aytib, firibgarlik sodir etgan yigit aniqlangani to‘g‘risida xabar berilgandi.
Izoh (0)