25-fevral kuni erta tongda Rossiya armiyasi o‘rta masofali raketalar va harbiy dronlar bilan Ukraina hududiga hujumlar tashkil etdi. Bu haqda CNN nashri xabar berdi.
Xabarda aytilishicha, Donetskning sharqiy mintaqasidagi Kostiantinivka shahrida intensiv hujumlar kuzatilgan. Hujum oqibatida bir kishi halok bo‘lgani xabar qilingan. Turar joy binolari va taʼlim muassasalariga jiddiy shikast yetgan.
Donetsk viloyati harbiy boshqarmasi bergan maʼlumotga ko‘ra, 25-fevral kuni Rossiya kuchlari Pokrovsk, Kramatorsk va Baxmut tumanlarini o‘qqa tutgan. 81 nafar mahalliy aholi vakillari hududlardan evakuatsiya qilingan.
Maʼlumotlarga qaraganda, markaziy Kiyev viloyati ham dronlar tomonidan nishonga olingan. Ammo mudofaa kuchlari bu hujumlarni muvaffaqiyatli qaytara olgan. Turar joy va muhim infratuzilma obyektlariga jiddiy shikast yetmagan. Qurbonlar haqida maʼlumot berilmagan.
Rossiyaning so‘nggi hujumiga munosabat bildirgan Ukraina harbiy-havo kuchlari qo‘mondonligi Rossiya tomonidan Kiyev, Poltava, Xmelnitskiy, Nikolayev, Kirovograd, Dnepropetrovsk, Zaporojye va Xerson viloyatlari tomon uchirilgan Eronda ishlab chiqarilgan 16 ta hujumkor dronlar yo‘q qilinganini maʼlum qilgan.
Izoh (0)