Bugun, 19-fevral kuni soat 11:00 holatiga respublikaning ko‘p qismida havo harorati nol darajadan past. Buni “O‘zgidromet” saytidagi faktik ob-havo maʼlumotlaridan ko‘rish mumkin.
Qayd etilgan ko‘rsatkichlarga ko‘ra, Qoraqalpog‘istonning Nukus shahrida havo harorati -10 daraja sovuq. Bu mamlakatdagi eng past havo harorati bo‘lib qolmoqda.
Shu bilan birga, Xorazm viloyatining Urganch shahrida harorat –6,8 darajagacha sovuq ekani qayd etildi. Qolgan hududlarda havo harorati –5 darajagacha sovuq.
So‘nggi maʼlumotlarga qaraganda, bugun Navoiy, Samarqand, Jizzax, Qarshi, Namanganda qor yog‘moqda. Eslatib o‘tish joiz, bu yilgi qish hisobidan vodiyga birinchi bor qor yog‘di.
Kecha eʼlon qilingan “O‘zgidromet” prognozlarida 19-fevral kuni mamlakatning ayrim joylarida qor yog‘ishi bayon etilgan edi.
Qoraqalpog‘iston va Xorazmda yog‘ingarchilik kutilmasligi, havo harorati 3 daraja sovuq va 2 daraja iliq bo‘lishi qayd etilgan. Kun davomida Toshkent shahrida havo biroz bulutli bo‘lishi, vaqti-vaqti bilan qor yog‘ishi mumkin.
Izoh (0)