Farmatsevtika mahsulotlari xavfsizligi markazi “Bar-VIPS” dori vositasining sertifikatlashtirilmagan seriyasidan ogohlantirdi.
Aytilishicha, sotuvda “VIPS-MED” MCHJ tomonidan ishlab chiqarilgan, og‘iz orqali yuborish uchun suspenziya tayyorlash kukuni shaklidagi “Bar-VIPS” preparatining sertifikatlashtirilmagan 520723 seriyasi aniqlangan. Ayni paytda ushbu holat bo‘yicha markaz laboratoriyasida mazkur dori vositasining sifati tekshirilmoqda.
Maʼlumot ko‘ra, “Bar-VIPS” dori preparatining quyidagi seriyalariga 500820, 530820, 510820, 520820, 540820, 370622, 380622, 480722 mamlakatda tibbiyot amaliyotida qo‘llashga ruxsat etilgan bo‘lib, ularning sifatini tasdiqlovchi tegishli muvofiqlik sertifikatlari rasmiylashtirilgan.
“Yuqoridagilardan kelib chiqib, Farmatsevtika mahsulotlari xavfsizligi markazi O‘zbekiston Respublikasi hududida dori vositalari va tibbiyot buyumlarining chakana savdosi bilan shug‘ullanuvchi (idoraviy mansubligidan, mulkchilik va boshqaruv shaklidan qatʼiy nazar) barcha tashkilotlarni ogohlikka chaqirib, “Bar-VIPS” preparatining sifatini tasdiqlovchi tegishli muvofiqlik sertifikatiga ega bo‘lmagan, shu jumladan, 520723 seriyasi, (yaroqlilik muddati 08.2025) aniqlanganda uni zudlik bilan sotuvdan chiqarib tashlashini so‘raydi.
Shu o‘rinda, Vazirlar Mahkamasining 2022-yil 21-fevraldagi 80-son qarori bilan tasdiqlangan “Maxsus elektron tizim orqali ayrim faoliyat turlarini litsenziyalash tartibi to‘g‘risida yagona nizom”ga muvofiq, dori vositalari va tibbiy buyumlarni muvofiqlik sertifikatlarisiz saqlash va (yoki) realizatsiya qilish litsenziya talablari va shartlarini qo‘pol ravishda buzilishi hisoblanib, litsenziyaning amal qilishini belgilangan tartibda to‘xtatilishiga olib kelishini eslatib o‘tamiz.
Shuningdek, Farmatsevtika mahsulotlari xavfsizligi markazi sog‘liqni saqlash sohasi mutaxassislaridan ”VIPS-MED“ MCHJ tomonidan ishlab chiqarilgan “Bar-VIPS” dori vositasini tibbiy maqsadlarda qo‘llashda o‘ramda ko‘rsatilgan seriyalarga eʼtibor berishlarini hamda “Bar-VIPS” preparatining quyidagi 500820, 530820, 510820, 520820, 540820, 370622, 380622, 480722 seriyalari tibbiyot amaliyotida qo‘llash uchun tasdiqlanganini maʼlum qiladi”, — deyiladi xabarda.
Izoh (0)