Indoneziya mudofaa vaziri Prabovo Subianto 59 foizga yaqin ovoz bilan prezidentlik saylovlarida yetakchilik qilmoqda. Bu haqda uch xil exit-poll natijalariga tayanib, Reuters xabar berdi.
Subiantoning raqiblari — Jakartaning sobiq gubernatori Basvedan Anis va Yava sobiq gubernatori Ganjar Pranovo mos ravishda 25 va 17,7 foiz ovoz olgan. Amaldagi prezident Joko Vidodo uchinchi muddatga nomzodini qo‘ya olmagan va Subiantoni qo‘llab-quvvatlagan. Shu bilan birga, uning 36 yoshli o‘g‘li Gibran Rakabuming Raka yangi vitse-prezident bo‘lishi mumkin.
“Shu yo‘l bilan Joko Vidodo hukumatdagi ma’lum ta’sirni saqlab qolishga harakat qilmoqda”, — deydi Reuters suhbatdoshlari.
Oktyabr oyida Indoneziya Konstitutsiyaviy sudi ilgari 40 yoshdan kichik bo‘lganlarning mazkur lavozimni egallashini taqiqlagan qonunni yumshatgandi.
“Indoneziyaning amaldagi rahbarining tanqidchilari uni siyosiy sulola yaratishga urinishda ayblamoqda”, — deb yozadi The Wall Street Journal.
Subianto Indoneziyaning eng qudratli oilalaridan biriga tegishli: uning otasi Bank Negara Indonesia nomli birinchi davlat bankiga asos solgan. 1983-yilda u 1966-yildan 1998-yilgacha mamlakatni boshqargan diktator Muhammad Suxartoning qiziga uylangan.
Izoh (0)