O‘zbekiston yengil atletika federatsiyasida BYD – VI Toshkent xalqaro marafoniga tayyorgarlik yuzasidan matbuot anjumani tashkil etildi.
Unda Milliy Olimpiya qo‘mitasi, Yengil atletika bo‘yicha Respublika Oliy sport mahorati maktabi, O‘zbekiston yengil atletika federatsiyasi mutasaddilari va OAV xodimlari qatnashdi.
Tadbirda so‘z olgan federatsiya raisi o‘rinbosari Kamoliddin Usmonov bu kabi ommaviy sport tadbirlarini o‘tkazish mamlakat aholisi, xususan, yoshlar orasida sog‘lom turmush tarzini keng tatbiq etishda muhim ahamiyat kasb etishini bildirdi. Shundan so‘ng federatsiya bosh kotibi Kamoliddin Ro‘zimuhammedov tashkiliy jarayon, trassa, ishtirokchi davlatlar, mukofot jamg‘armasi, ro‘yxatdan o‘tish tartibi va shu kabi asosiy masalalar bo‘yicha taqdimot o‘tkazdi.
Unga ko‘ra, VI Toshkent xalqaro marafoni mamlakatda tashkil etiladigan yagona World Athletics Label darajasidagi tadbir hisoblanadi. Bu gal ishtirokchi davlatlar geografiyasi kengayib, 32 mamlakatdan mohir yuguruvchilar bahs olib borishi kutilmoqda.
Dasturga ko‘ra, poygalar marafon (42 km, 195 metr), yarim marafon (21 km), shuningdek, 3 va 10 km masofalarga yugurish yo‘nalishlarida o‘tkaziladi. Qolaversa, uning doirasida bolalar uchun “Kids Run” va skandinavcha yurish bo‘yicha bellashuvlar ham tashkil etilishi kutilmoqda. Yana bir ahamiyatli tomoni, bu yil sovrin jamg‘armasi 720 million so‘mga oshirilmoqda.
BYD – VI Toshkent xalqaro marafoni 21-aprel kuni bo‘lib o‘tadi.
Izoh (0)