“Jamoat transportiga har tomonlama ustunlik berilishi, avtomobillar hashamatga aylanishi kerak” — Shavkat Mirziyoyev

Shavkat Mirziyoyev 29-yanvar kuni o‘tkazgan videoselektor yig‘ilishida jamoat transportiga har tomonlama ustunlik berilishi, avtomobillar esa hashamatga aylanishi kerakligini aytdi.

Yig‘ilishda Toshkent shahrida tirbandlik katta muammoga aylanib borayotgani qayd etildi.

Ayrim ko‘chalarda ish kunlari o‘rtacha 7-9 ballik, ba’zan 10 ballik tirbandliklar kuzatilmoqda, ba’zilariga 2 karra ko‘p yuklama tushmoqda. Oqibatda kunning tig‘iz paytida manzilga borish uchun 2 barobar ko‘p vaqt sarflanmoqda.

Bosh vazir o‘rinbosari Ochilbek Ramatov, Transport vazirligi, Toshkent shahar hokimligiga tizimli yondashgan holda tirbandliklar muammosi bo‘yicha takliflarni shakllantirish va prezidentga taqdimot qilish topshirildi.

“Shaharsozlik va yo‘l harakatiga mas’ul barcha bo‘g‘indagi rahbarlar ‘Shahar – piyodalar uchun’ degan shiorni o‘zining asosiy tamoyili qilib olishi shart”, — dedi prezident.  

Shavkat Mirziyoyevning ta’kidlashicha, bunda, jamoat transportiga har tomonlama ustunlik berilishi, avtomobillar esa hashamatga aylanishi kerak.