Shavkat Mirziyoyev uy-joy, qurilish, kommunal xo‘jaligi, transport va ekologiya sohalarida amalga oshirilgan ishlar va ustuvor vazifalar yuzasidan yig‘ilishda yangi uy-joylar tannarxiga to‘xtalib o‘tdi.
Prezident quruvchilar uchun moliyaviy resurs yetishmasligi, bori ham qimmatligini qayd etdi. Resurs yo‘qligi uchun quruvchilar aholi mablag‘larini poydevor quyish bosqichida jalb qilib, ulushdor sifatida rasmiylashtirayotganini, ayrim nopok quruvchilar hisobiga odamlar himoyasiz qolayotganini aytdi.
Hozirgi amaliyotga muvofiq, kadastr hujjati yo‘q uyga ipoteka krediti berish mumkin emas. Shulardan kelib chiqib, mutasaddilarga ilg‘or xorijiy tajribani o‘rgangan holda Ipotekani qo‘llab-quvvatlash jamg‘armasini tashkil qilish topshirildi.
Uy-joy qurilishiga aholi ulushdor bo‘lib kirishini huquqiy tartibga solish va qurilish korxonalariga aylanma mablag‘ni ko‘paytirish vazifasi qo‘yildi.
2024-yilda 80 ming xonadonli 1 ming 800 ta uy-joy qurish va “Yangi O‘zbekiston” massivlarini 38 tadan 45 taga yetkazish maqsad qilib olindi.
Izoh (0)