Oliy Majlisning Inson huquqlari bo‘yicha vakili (ombudsman) va uning huzuridagi jamoatchilik guruhlari vakillari 6-may kuni Toshkent viloyati Zangiota tumanidagi 1-son Tergov hibsxonasini monitoring qildi. Bu haqda Ombudsman axborot xizmati xabar bermoqda.
O‘rganish davomida hibsxonada bir qator kamchiliklar mavjudligi, jumladan, ayrim kameralarda sanitariya-gigiyena holati talab darajasida emasligi, saqlanayotgan shaxslarga sayr uchun yetarli vaqt berilmayotgani hamda tibbiy xizmat ko‘rsatish bo‘yicha ayrim eʼtirozlar bildirilgan.
Maʼlumki, 2022-yil 1-2-iyul kunlari Nukus shahridagi ommaviy tartibsizliklarni sodir etganlikda ayblangan 22 nafar shaxsga nisbatan Oliy sudning Jinoyat ishlari bo‘yicha sudlov hayʼatida jinoyat ishi apellyatsiya tartibida ko‘rib chiqilmoqda. Shu bois ayblanuvchilar 1-son tergov hibsxonasida saqlanmoqda.
Monitoring tashrifi davomida ushbu ayblanuvchilar saqlanayotgan kameralarga, xususan, Dauletmurat Tajimuratov saqlanayotgan kameraga ham tashrif buyurilgan. Ular bilan jamoaviy va yakka tartibda xoli tarzda suhbatlar o‘tkazilgan. Unda hibsxonadagi saqlash sharoitlari va oziq-ovqat taʼminotidan eʼtirozlari yo‘qligini maʼlum qilishgan.
Dauletmurat Tajimuratov ham advokati va himoyachisi bilan uchrashuvlarga ruxsat berilayotganligini, biroq hibsxona xodimlari unga huquq va majburiyatlarini yetarli darajada tushuntirishmaganliklari, shu bois hibsxona xodimlariga nisbatan ayrim eʼtirozlarini bildirib o‘tgan.
Aytilishicha, Dauletmurat Tajimuratov 1-son Tergov hibsxonasiga olib kelinganidan so‘ng tashrif kuniga qadar himoyachisi, yaʼni ukasi Renat Tajimuratov bilan 7 marotaba va advokati Sergey Mayorov bilan 2 marotaba xoli tarzda uchrashgan.
Izoh (0)