“Daryo”da Qashqadaryo viloyatining Qarshi shahrida yashovchi, hali olti yoshga ham yetmagan Akbarshoh ismli bola qiynoqlar va ruhiy bosim ostida yashayotgani, “dom”dan pastga tashlab yuborish bilan qo‘rqitilgani xabar berilgandi. Qashqadaryo viloyat IIB axborot xizmati rahbari Iroda Rasulovaning xabar berishicha, voqea IIB boshlig‘i Shuhrat Sotvoldiyev nazoratiga olingan.
Mas’ulga ko‘ra, voqea bugun viloyatdagi mavjud tashkilot mas’ullari, vakillari ishtirokida muhokama qilingan.
Muhokama paytida ruhiy va jismoniy bosimlar ostida qolayotgani aytilayotgan bola — Akbarshoh Qanoatov psixologlar, mutaxassislar suhbatida bo‘lgan va ularni qiziqtirgan savollarga javob bergan.
“Daryo”ga kelib tushgan videodan anglashilishicha, bola psixolog va mutaxassislar savoliga javob berar ekan, onasi va Jasur ismli shaxslar kaltaklaganini takrorlagan.
Bolaning otasi — Ulug‘bek Azizovning “Daryo”ga qo‘shimcha qilishicha, bugungi muhokamada viloyatdagi mas’ul tashkilotlardan kelgan 31 nafar vakil ishtirok etgan.
Viloyat IIB axborot xizmati rahbari Iroda Rasulova bugungi muhokamada qanday masalalar muhokama qilingani, dastlabki xulosalar nimalardan iboratligi haqida tez orada qo‘shimcha ma’lumot berilishini bildirdi.
Avvalroq bolalar ombudsmani kaltaklangan bola voqeasi bo‘yicha jinoyat ishi qo‘zg‘atish rad etilganini ma’lum qilgandi.
Izoh (0)