“Дарё”да Қашқадарё вилоятининг Қарши шаҳрида яшовчи, ҳали олти ёшга ҳам етмаган Акбаршоҳ исмли бола қийноқлар ва руҳий босим остида яшаётгани, “дом”дан пастга ташлаб юбориш билан қўрқитилгани хабар берилганди. Қашқадарё вилоят ИИБ ахборот хизмати раҳбари Ирода Расулованинг хабар беришича, воқеа ИИБ бошлиғи Шуҳрат Сотволдиев назоратига олинган.
Масъулга кўра, воқеа бугун вилоятдаги мавжуд ташкилот масъуллари, вакиллари иштирокида муҳокама қилинган.
Муҳокама пайтида руҳий ва жисмоний босимлар остида қолаётгани айтилаётган бола — Акбаршоҳ Қаноатов психологлар, мутахассислар суҳбатида бўлган ва уларни қизиқтирган саволларга жавоб берган.
“Дарё”га келиб тушган видеодан англашилишича, бола психолог ва мутахассислар саволига жавоб берар экан, онаси ва Жасур исмли шахслар калтаклаганини такрорлаган.
Боланинг отаси — Улуғбек Азизовнинг “Дарё”га қўшимча қилишича, бугунги муҳокамада вилоятдаги масъул ташкилотлардан келган 31 нафар вакил иштирок этган.
Вилоят ИИБ ахборот хизмати раҳбари Ирода Расулова бугунги муҳокамада қандай масалалар муҳокама қилингани, дастлабки хулосалар нималардан иборатлиги ҳақида тез орада қўшимча маълумот берилишини билдирди.
Аввалроқ болалар омбудсмани калтакланган бола воқеаси бўйича жиноят иши қўзғатиш рад этилганини маълум қилганди.
Изоҳ (0)