Namanganda Kamoliddin Rahimov muzeyi ochildi

Namangan shahridagi 11-sonli bolalar musiqa va sanʼat maktabida O‘zbekiston xalq artisti Kamoliddin Rahimov muzeyi ochildi. Bu haqda “Daryo” muxbiri Azizbek Abduvaliyev xabar bermoqda.

Muzeydan hofizning shaxsiy buyumlari, sozlari, foto va video manbalar, qo‘shiqlaridan iborat disklar, hayoti va ijodiga bag‘ishlangan kitoblar, gazeta va jurnallar o‘rin oldi.

Muzeyning ochilish marosimida Namangan shahri hokimi Anvarjon Otaxo‘jayev, xonandaning oila aʼzolari va muxlislar ishtirok etdi.

Maktabda hofiz tavalludining 81-yilligiga bag‘ishlangan “Kamoliddin Rahimov qo‘shiqlari” respublika festivali ham o‘tkazildi. Unda vodiy va voha viloyatlari hamda poytaxtdan kelgan havaskor va professional sanʼatkorlar ishtirok etdi.

Maʼlumot uchun, hozirda Namanganda O‘zbekiston xalq artisti Kamoliddin Rahimov nomidagi musiqa va sanʼat maktabini ochish yuzasidan ham tashkiliy ishlar olib borilmoqda.