Rossiya Xavfsizlik kengashi raisi o‘rinbosari Dmitriy Medvedev Buyuk Britaniya bosh vaziri Rishi Sunakning Kiyevga tashrifi chog‘ida Buyuk Britaniya va Ukraina o‘rtasida xavfsizlik bo‘yicha hamkorlik bitimi imzolanganiga izoh berdi.
Medvedevning aytishicha, Rossiya Britaniya qo‘shinlarining Ukraina hududiga kiritilishini urush e’lon qilish sifatida qabul qiladi.
“Agar Britaniya delegatsiyasi Kiyev markazida kassetali qurollardan o‘qqa tutilsa, G‘arb jamoatchiligi bunga qanday munosabatda bo‘lardi? Bizning Belgorod shahrimiz tinch aholisi bilan xuddi shunday voqea sodir bo‘ldi”, — deb yozdi Medvedev Telegram kanalida.
Bugun, 12-yanvar kuni Rishi Sunak Ukraina prezidenti Vladimir Zelenskiy bilan uchrashish uchun Kiyevga keldi. Avvalroq Buyuk Britaniya bosh vazirining idorasi tashrif chog‘ida u 2,5 milliard funt sterlinglik yangi harbiy yordam paketi va xavfsizlik bo‘yicha hamkorlik kelishuvi imzolanishini e’lon qilishi haqida xabar bergan edi.
Sunak idorasining aniqlik kiritishicha, 2024 va 2025-yillarga mo‘ljallangan harbiy yordam paketi Ukrainaga ko‘plab dronlarni yetkazib berishni o‘z ichiga oladi. Dronlarning asosiy qismi Buyuk Britaniyada ishlab chiqariladi.
Xavfsizlik sohasidagi hamkorlik kelishuvi razvedka ma’lumotlarini almashish, tibbiyot va harbiy xizmatchilarni tayyorlash hamda mudofaa sanoatining hamkorlikda yo‘lga qo‘yilishidan iborat. Bosh vazir saytida berilgan bayonotga ko‘ra, 2024 va 2025-yillarda Britaniyaning Ukrainaga harbiy yordami 200 million funt sterlingga oshadi.
E’lon qilingan yordam paketi bilan bir qatorda, Buyuk Britaniya Ukraina armiyasiga umumiy qiymati 12 milliard funt sterlinglik harbiy yordam yubordi.
Izoh (0)