Россия Хавфсизлик кенгаши раиси ўринбосари Дмитрий Медведев Буюк Британия бош вазири Риши Сунакнинг Киевга ташрифи чоғида Буюк Британия ва Украина ўртасида хавфсизлик бўйича ҳамкорлик битими имзоланганига изоҳ берди.
Медведевнинг айтишича, Россия Британия қўшинларининг Украина ҳудудига киритилишини уруш эълон қилиш сифатида қабул қилади.
“Агар Британия делегацияси Киев марказида кассетали қуроллардан ўққа тутилса, Ғарб жамоатчилиги бунга қандай муносабатда бўларди? Бизнинг Белгород шаҳримиз тинч аҳолиси билан худди шундай воқеа содир бўлди”, — деб ёзди Медведев Telegram каналида.
Бугун, 12 январь куни Риши Сунак Украина президенти Владимир Зеленский билан учрашиш учун Киевга келди. Аввалроқ Буюк Британия бош вазирининг идораси ташриф чоғида у 2,5 миллиард фунт стерлинглик янги ҳарбий ёрдам пакети ва хавфсизлик бўйича ҳамкорлик келишуви имзоланишини эълон қилиши ҳақида хабар берган эди.
Сунак идорасининг аниқлик киритишича, 2024 ва 2025 йилларга мўлжалланган ҳарбий ёрдам пакети Украинага кўплаб дронларни етказиб беришни ўз ичига олади. Дронларнинг асосий қисми Буюк Британияда ишлаб чиқарилади.
Хавфсизлик соҳасидаги ҳамкорлик келишуви разведка маълумотларини алмашиш, тиббиёт ва ҳарбий хизматчиларни тайёрлаш ҳамда мудофаа саноатининг ҳамкорликда йўлга қўйилишидан иборат. Бош вазир сайтида берилган баёнотга кўра, 2024 ва 2025 йилларда Британиянинг Украинага ҳарбий ёрдами 200 миллион фунт стерлингга ошади.
Эълон қилинган ёрдам пакети билан бир қаторда, Буюк Британия Украина армиясига умумий қиймати 12 миллиард фунт стерлинглик ҳарбий ёрдам юборди.
Изоҳ (0)