G‘arb raketalari yordamida Rossiyaning uchirish moslamalarini yo‘q qilishga urinishlar bunday davlatga qarshi yadro qurolini qo‘llashga asos bo‘ladi. Bu haqda Rossiya Xavfsizlik kengashi raisi o‘rinbosari Dmitriy Medvedev ma’lum qildi.
![](/static/2024/01/11/photo_2024-01-11_19-24-18-DMByAjYv.jpg)
Medvedevga ko‘ra, G‘arbning uzoq masofaga uchuvchi raketalari yordamida Rossiyaning uchirish moslamalariga zarba berishni “yaxshi metod” deb o‘ylashadi.
“Bu nimani anglatadi? Ha, faqat bitta narsani — ular Rossiyaning yadroviy to‘xtatib turish sohasidagi davlat siyosati asoslarining 19-bandiga qarshi borishlari mumkin: g) oddiy qurollardan foydalangan holda Rossiya Federatsiyasiga tajovuz qilish, bunda davlatning mavjudligi tahdid ostida bo‘ladi. Bu hech qanday o‘z-o‘zini himoya qilish huquqi emas, balki shunday davlatga qarshi yadro qurolidan foydalanishimiz uchun to‘g‘ridan-to‘g‘ri va aniq asosdir. Gitler, Mussolini, Petenning barcha merosxo‘rlari va Kiyevdagi ‘natsistlar’ni qo‘llab-quvvatlayotgan bugungi Yevropadagi boshqalar buni yodda tutishlari kerak”, — deya qo‘shimcha qildi Medvedev.
Shuningdek, u Rossiya hozircha Ukrainaga qarshi barcha turdagi qurollardan foydalanganini ma’lum qildi.
“Har xil tarkibga ega bo‘lgan turli raketa tashuvchilar ishlatilgan, hozircha yadroviylardan tashqari”, — degan u.
Rossiya to‘rtta vaziyatda yadro qurolidan foydalanishi mumkin
Bu Rossiya harbiy doktrinasida ochiq-oydin ko‘rsatilgan. Jumladan, 19-bandda, yadroviy quroldan foydalanish mumkin bo‘lgan to‘rtta vaziyat: yadroviy raketalarni uchirish, yadro qurolidan foydalanish, yadro qurolini nazorat qiluvchi muhim infratuzilma yoki davlatning mavjudligiga tahdid soladigan boshqa harakatlar shular jumlasidandir.