Сирдарё вилоятида ариқларни бетонлаштириш жараёнида табиатга 232 миллион сўм зарар етказилди. Бу ҳақда Экология вазирлиги ахборот хизмати хабар берди.
Маълум қилинишича, Сирдарё вилоятида олиб борилган ўрганиш ишлари давомида Гулистон тумани “Ишонч” СИУ ҳудудида ариқларни бетонлаштириш учун дарахтларни кесиш юзасидан мурожаат қилинган. Сирдарё вилояти Экология бошқармаси эса дарахтларни кесишга рухсат бермаган. Бугунги кунда ушбу манзарали дарахтларга ҳеч қандай шикаст етказилмаган.
Аммо бошқа бир ҳудудда дарахтлар рухсатсиз кесилган. Яъни Гулистон шаҳри ва Мирзаобод тумани ҳудудидан оқиб ўтувчи канал ва ариқларни бетонлаштириш жараёнида 20 тупдан ортиқ дарахт илдизи билан қўпориб ташланган. Натижада табиатга 232 миллион 560 минг сўм миқдорида зарар етказилган. Ҳолат юзасидан тўпланган ҳужжатлар қонуний чора кўриш мақсадида вилоят прокуратурасига юборилган. Ҳозирда ҳолат бўйича тегишли тартибда суриштирув ишлари олиб борилмоқда.
Қолган ҳудудларда ҳам ўрганиш ишлари давом эттирилиб, дарахтлар бетон қопламалардан тозаланмоқда. Юқоридаги ҳолатлар юзасидан Экология, атроф-муҳитни муҳофаза қилиш ва иқлим ўзгариши вазири томонидан Сув хўжалиги вазирлиги ва ҳокимликларга огоҳлантириш хатлари ва тақдимномалар киритилмоқда.
Изоҳ (0)