Samarqand viloyati hokimi Erkinjon Turdimov viloyatda dori sohasi biznesga aylanib ketganini, odamlarning sog‘lig‘i orqali boyishni istab, bemorlarning ahvolini ikkinchi o‘ringa qo‘yayotgan tibbiyot xodimlari borligini tan oldi va ularni tanqid qildi. Bu haqda viloyat hokimligi axborot xizmati xabar berdi.
Noinsof, o‘tirasan-da, yozaverasan, yozaverasan retseptni, cho‘ntagidan uraverasan. Bitta Samarqand boshqa davlatlarga 482 million dollar pul ko‘chirib, dori sotib oladi. Boshqa davlat odamlarini ish bilan ta’minlaymiz. Boshqa davlat budjetini samarqandliklar hisobidan to‘ldiramiz. Boshqa davlatni boy qilamiz. O‘zimiz u dorilarni ichib, mayib bo‘lamiz. Pachkalab, tonnalab dori yeymiz, — dedi viloyat hokimi Erkinjon Turdimov.
Samarqand hokimining ta’kidlashicha, viloyatda bir shifoxona oldida faoliyat yuritayotgan dorixonalar soni ba’zan 20 tadan oshadi.
Bu dori biznes bo‘lib ketdi. Odamlarning sog‘lig‘i biznesga aylanib ketdi. Ochig‘ini aytaman, yashirmayman. Ko‘p vrachlar o‘zining tanish aptekasi orqali dori yozib beradi. Standartga mutlaqo rioya qilmaydi, — dedi Erkinjon Turdimov.
Viloyat rahbari hududda endilikda har hafta shifokorlar va dorixona mas’ullarining faoliyati nazoratga olinishi kerakligini aytmoqda.
Har hafta nima bo‘ldi, qaysi noinsof aptekachi, qaysi noinsof vrach standartdan chiqdi, nazorat qilish kerak. “Chastniy”larning diqqatiga, kimdir kerak, no kerak dorilarni yozib beradigan bo‘lsa, u korxonaga nisbatan yopish choralarini ko‘ramiz. Qonuniy. Sudga beramiz o‘sha korxonani va xalqqa o‘sha korxonani tanishtiramiz. “Glavvrachi”ni ham ta’sischisini ham. Buni hamma xususiy klinikalar qulog‘iga quyib olishi kerak. Xalqning sog‘lig‘i ortidan boylik orttirishni niyat qilayotgan bo‘lsa, u o‘ziga dushmanlik qilayotgan bo‘ladi, — dedi Erkinjon Turdimov.
Samarqand viloyati Sog‘liqni saqlash boshqarmasi boshlig‘i o‘rinbosari Doniyor Asadovning yig‘ilishda ma’lumot berishicha, Samarqand shahridagi 1-sonli bolalar shifoxonasida bemorni laborator tekshiruvlardan o‘tkazish uchun xususiy klinika bilan kelishib, uni klinikaga yuborganligi, shuningdek, bemorga yozilgan dorilar orasida unga keragi bo‘lmagan ko‘plab har xil turdagi qimmat firma dorilar borligi aniqlangan.
Nimaga “chastniy”ga jo‘natgan, o‘zida tekshirish imkoniyati yo‘qmi? Yo‘q bo‘lishi mumkin, shu sabab “chastniy”ga yuborgan bo‘lishi mumkin, — dedi bu ma’lumotga munosabat bildirgan hokim.
Yig‘ilishda shifoxonalarga budjet mablag‘lari evaziga olib berilgan dorilar bo‘lishiga qaramasdan, bemorlarga dorixonalardan sotib olib kelishga topshiriq berilayotgani ham ta’kidlangan.
Har bitta kiradigan joyga, qanaqa dorilar borligini yozib qo‘yish kerak. Doska qilib, bo‘r bilan yozing. Shifoxonada har kuni qanaqa turdagi dorilar mavjudligini, qanaqa dorilar bepul va qanaqa dorilar pullik ekanini yozib qo‘yish kerak. Ayrimlar shpristni ham olib kelganman derdi. Hozir bilmayman, o‘zim qo‘lim bilan ushlamadim hali, — dedi hokim.
Viloyat rahbari endilikda ishchi guruh tashkil etilib, hududdagi mazkur holatlarni o‘rganishini bildirdi.
Kim standratdan chiqib, retsept yozsa, ishdan ketishi kerak. Shuning uchun hamma tibbiyot birlashmalari, “chastniy” firmalar hamma xodimlar bilan tuzilgan shartnomaga qo‘shimcha kiritadi. Adliya va argos bilan kelishib, xodimlar shartnomasini qaytadan tuzasanlar, — dedi Turdimov.
Qo‘shimcha qilinishicha, Samarqand viloyatida mahalliy ishlab chiqaruvchilar tomonidan 200 turdagi dori-darmon ishlab chiqariladi.
Izoh (1)
Hokim buva toʻgʻri koʻtaribdi shu mavzuni , biz ham shunaqangi jirkanch ishlarga duch kelganmiz va davom atmoqda ham Oʻzbekiston boʻyicha kuzatilayotgandir balki , bu insofli shifokorlarni ham nomiga dogʻ tushiradi , rahbariyatdan iltimos qilamiz bu ishlarni oldini olishni.