Raqobat qo‘mitasi bayram oldidan chegirmali tovarlarni sotib olishda e’tiborli bo‘lishga chaqirdi

Raqobatni rivojlantirish va iste’molchilar huquqlarini himoya qilish qo‘mitasi chegirmali tovarlarni sotib olishda e’tiborli bo‘lishga chaqirdi.

So‘nggi kunlarda internet, ijtimoiy tarmoqlarda aksiyalar, tovarlarning kelishilgan miqdorini sotib olish sharti bilan taqdim etiladigan chegirmalar, mavsumiy chegirmalar tashkil qilingani haqida xabarlar tarqalmoqda. Bunda ko‘pincha muayyan holatga chegirmalar (kompaniyaning yilligi, milliy bayram va boshqalar) keng qo‘llaniladi.

Tahlillarning ko‘rsatishicha, ayrim yirik savdo tarmoqlari foyda olish maqsadida ko‘pincha xaridorlar bilan turli xil manipulyatsiyalarga kirishishi, masalan, dastlab taklif qilinadigan tovarlarning narxlari iloji boricha haddan tashqari oshirib yuborilishi, so‘ngra ularning narxi haqiqiy narxigacha tushirilishi mumkin. Bunda xaridorlar tomonidan chegirmali tovarlarni xarid qilish orqali ularda foydali xarid xayolini keltirib chiqarish mumkin.

“Odatda ko‘pincha, bayramlar oldidan yirik savdo markazlari va do‘konlar tovar narxlarini keskin ko‘tarishi, keyin esa chegirmalar e’lon qilish orqali go‘yoki, tovar narxlarini keskin tushirilgani to‘g‘risida reklamalar beriladi, haqiqatda esa chegirmadagi tovar narxi eski narxdagi holatiga qaytarib, go‘yoki 20-30 foiz chegirmalar qo‘llanilgandek taqdim etiladi”, —  deyiladi qo‘mita xabarida.

Shu sababli qo‘mita tovar va mahsulotlarni chegirma bilan sotish holatlariga e’tiborliroq bo‘lish, tovarlarni sotib olishdan oldin uning sifati va nuqsonsiz ekanligini tekshirishni unutmaslikka chaqirdi.

“Hurmatli iste’molchilar, Sizdan tovarlarni chegirma bilan xarid qilishda to‘siq va muammolar yoki noto‘g‘ri va ishonchsiz reklamalarni tarqatish holatlari kuzatilgan taqdirda qo‘mita ishonch raqami orqali (1159) murojaat qilishingiz so‘raladi”, — deyiladi xabarda.

Ma’lumot uchun, “Iste’molchilar huquqlarini himoya qilish to‘g‘risida”gi qonunning 6-moddasiga muvofiq, ishlab chiqaruvchi (ijrochi, sotuvchi) iste’molchiga o‘zi realizatsiya qilayotgan tovar (ish, xizmat)lar haqida o‘z vaqtida zarur, to‘g‘ri va tushunarli ma’lumot berishi shartligi belgilangan.

“Reklama to‘g‘risida”gi qonunning 16-moddasiga ko‘ra, nomaqbul (noto‘g‘ri, axloqsiz, yashirin reklama, shuningdek ushbu qonun talablariga mos kelmaydigan boshqa) reklama taqiqlangan.