Raqobatni rivojlantirish va iste’molchilar huquqlarini himoya qilish qo‘mitasi 2023-yilning 11 oyi davomida insofsiz raqobat holatlari bo‘yicha 300 ga yaqin murojaat kelib tushganini ma’lum qildi.
Qayd etilishicha, ushbu murojaatlar yuzasidan amalga oshirilgan ishlar natijasida 100 ga yaqin tadbirkorlarning huquqlari himoya qilinishi taʼminlangan.
Murojaatlar bo‘yicha 86 ta ajrim chiqarilgan, jumladan:
- qonunbuzilish alomatlari bo‘yicha 62 ta ish qo‘zg‘atilgan va belgilangan tartibda ko‘rib chiqilgan;
- qonunbuzilish alomatlari mavjud bo‘lmaganligi sababli 24 ta ishni qo‘zg‘atish rad etilgan.
126 tasi bo‘yicha ularni belgilangan tartibda ko‘rib chiqish uchun zarur maʼlumotlar va hujjatlar yetishmasligi sababli ariza egalariga qonunchilik talablari to‘g‘risida tushuntirishlar berilgan. Uchtasi apellyatsiya tartibida kelib tushgan, shundan 2 tasi ko‘rib chiqilgan va apellyatsiya talabi qanoatlantirilgan, Bittasi ko‘rib chiqilmoqda, uchta bo‘yicha hozirgi kunda o‘rganish ishlari amalga oshirilyapti.
Xususan, IPlus MCHJ (provayder Comnet) va Flink MCHJ (provayder Free Link) internet provayder sifatida bir tovar bozorida, yaʼni abonentlarni internet tarmog‘iga ulash va xizmat ko‘rsatish sohasida faoliyat yuritadi. IPlus MCHJ qo‘mitaga murojaat qilib, Flink MCHJga nisbatan chora ko‘rishni, u IPlus MCHJning ishchanlik obro‘siga putur yetkazib, abonentlar o‘rtasida asossiz maʼlumotlar tarqatganidan norozi bo‘lib shikoyat qilgan. Ishni ko‘rib chiqish jarayonida qilingan murojaat tasdiqlovchi materiallari bilan o‘z isbotini topgan. Murojaat o‘rganib chiqilib, Flink MCHJga nisbatan belgilangan tartibda ish qo‘zg‘atilgan.
Maxsus komissiya tomonidan Flink MCHJni “Raqobat to‘g‘risida”gi qonunning raqobatchini obro‘sizlantirish, yaʼni raqobatchi xo‘jalik yurituvchi subyektning faoliyatiga salbiy taʼsir ko‘rsatishi yoki uning ishchanlik obro‘siga putur yetkazishi mumkin bo‘lgan holatni sodir etgan deb topilgan va Flink MCHJga qonunbuzilish holatini bartaraf etish hamda kelgusida bunday qonunbuzilish holatiga yo‘l qo‘ymaslik to‘g‘risida ko‘rsatma berilgan.
Shuningdek, Qo‘mita Maxsus komissiyasining 2023-yildagi tegishli qarorlariga ko‘ra Sunrise International Trade MCHJ va Dubai cars MCHJ o‘zlarining faoliyatida “Raqobat to‘g‘risida”gi qonunining tegishli moddalari talablarini buzgan deb topilgan va ularga ushbu qonunbuzilish holatini bartaraf qilish to‘g‘risida ko‘rsatma berilgan.
Lekin ushbu MCHJlar tomonidan bir necha bor qo‘mita talablari bajarilmagani va bu boshqa bir tadbirkorlik subyektlarining huquqlarini buzayotgani sababli Raqobat qo‘mitasi tomonidan MCHJ rahbarlariga maʼmuriy bayonnoma rasmiylashtirish uchun ularni olib kelish yuzasidan IIVning Toshkent shahar va Sirdaryo viloyati boshqarmalariga murojaat kiritilgan.
Izoh (0)