O‘zbekistonda budjet puli hisobidan Yangi yil bayrami korporativlari o‘tkazish taqiqlandi

O‘zbekistonda hukumat topshirig‘i bilan davlat tashkilotlariga Yangi yil munosabati bilan korporativ bayramlar o‘tkazish taqiqlangani haqida xabar tarqaldi. Bosh vazir matbuot kotibi Bekzod Hidoyatov buni “Daryo”ga tasdiqladi.

Ma’lum qilinishicha, barcha vazirlik, idora va boshqa davlat tashkilotlari, mahalliy ijro etuvchi hokimiyat organlari hamda davlat ulushi mavjud xo‘jalik jamiyatlari va tijorat banklariga budjet va undan tashqari mablag‘lar hisobidan Yangi yil bayrami munosabati bilan korporativ yig‘ilishlarni tashkil etish va bayram dasturxonini yozish taqiqlandi.

Xodimlar o‘z oyliklari yoki rag‘bat pullaridan tashkil etishi bundan mustasno.

“Budjet puli — xalqning puli. Uning har bir tiyini hisobli. Xalqimiz bu pullarni bizning o‘yin-kulgi qilishimiz uchun bermagan” — degan bosh vazir Abdulla Aripov.

Eslatib o‘tamiz, o‘tgan yili ham bosh vazir topshirig‘i bilan budjet hisobidan Yangi yil munosabati bilan korporativ bayramlar o‘tkazish taqiqlangandi.