Жиноят ишлари бўйича Андижон вилояти суди ҳукми билан блогер Отабек Аҳлиддинов 7 йил-у 1 ой муддатга озодликдан маҳрум қилинди. Бу ҳақда “Эзгулик” инсон ҳуқуқлари жамияти раҳбари Абдураҳмон Ташанов ўзининг Facebook даги саҳифаси орқали маълум қилди.
Маълум қилинишича, Отабек Аҳлиддинов Жиноят кодексининг 167-моддаси (ўзлаштириш ёки растрата йўли билан талон-тарож қилиш) 2-қисмида назарда тутилган жиноятни содир этганликда айбланган.
У Андижон вилояти Шаҳрихон туманидаги марказий поликлиниканинг бўлим раҳбари лавозимида фаолият олиб борган. Айблов хулосасига кўра, Аҳлиддинов 200 миллион сўмдан ортиқ пулни ўзлаштиришда айбланган.
Блогер шу йилнинг сентябрида қамоққа олинган. Дастлаб у жиноят ишлари бўйича Хонобод тумани суди ҳукми билан 5 йил 1 ойдага озодликдан маҳрум қилинган. Сўнг прокуратуранинг протести асосида аппеляция суди ишни қайта кўриб, муддатни 7 йил 1 ойга узайтирган.
- Аввалроқ 6,6 йил муддатга озодликдан маҳрум этилган блогер Отабек Сатторий умумий тартибли колониядан манзил-колонияга ўтказилгани тўғрисида хабар берилганди.
Изоҳ (0)