Savdo-sanoat palatasi “Hunarmandchilik faoliyati to‘g‘risida”gi qonun loyihasini muhokamaga qo‘ydi.
Loyihada “Usta-shogird” maktabi tushunchasi, hunarmandning huquq va majburiyatlari, faoliyatni amalga oshirishning o‘ziga xos xususiyatlari, hunarmandchilik faoliyati yo‘nalishlari belgilangan.
Shuningdek, “Hunarmand” uyushmasi faoliyatining ustuvor vazifalari va yo‘nalishlari belgilangan.
Qonun Milliy katalog va turizm sohasida faoliyat ko‘rsatayotgan hunarmandlar reyestri, hunarmandlarni davlat tomonidan qo‘llab-quvvatlash masalalari, hunarmand va shogird o‘rtasidagi munosabatlar, hunarmand bo‘lish istagini bildirgan fuqarolarni professional o‘qitish va boshqa masalalarni o‘z ichiga oladi.
Loyiha hunarmandchilik faoliyati uchun qo‘shimcha imkoniyat va qulayliklarni yaratish, xomashyo bazasini mustahkamlash orqali aholi bandligini taʼminlash hamda hunarmandlarning qonuniy huquq va manfaatlarini taʼminlashni nazarda tutadi.
Qonun loyihasining qabul qilinishi hunarmandchilik faoliyati, xalq hunarmandchiligi va amaliy sanʼatning anʼanaviy turlarini yanada rivojlantirishga xizmat qiladi.
Avvalroq Toshkentda Xalqaro hunarmandchilik instituti tashkil etilishi to‘g‘risida xabar berilgandi. Institutda bakalavriat taʼlim yo‘nalishlari va magistratura mutaxassisliklariga qabul parametrlari respublika mehnat bozori ehtiyojlari hamda universitetning moddiy-texnik imkoniyatidan kelib chiqib, Oliy taʼlim, fan va innovatsiyalar vazirligi bilan kelishilgan holda institut tomonidan belgilanadi.
Izoh (0)