Bugun “Milliy matbuot markazi”da “Mikrokreditbank” ATB tomonidan olib borilayotgan transformatsiya jarayonlari” mavzusida matbuot anjumani o‘tkazildi.
Ushbu tadbirni “Mikrokreditbank” ATB boshqaruv raisining birinchi o‘rinbosari A.Hamidov ochib, bank tomonidan olib borilayotgan transformatsiya jarayonlari to‘g‘risida maʼlumot berdi.
Maʼlumki, yurtimizda tadbirkorlikni rivojlantirish, aholi bandligini taʼminlash hamda hududlarni kompleks ijtimoiy-iqtisodiy rivojlantirish bo‘yicha belgilangan vazifalar ijrosini taʼminlashda Mikrokreditbank o‘zining munosib hissasini qo‘shib kelmoqda.
Shu maqsadda xalqaro PriceWaterhouseCoopers (PWS) konsalting kompaniyasi bilan hamkorlikda “Mikrokreditbankning 2022—2025-yillarda rivojlantirish strategiyasi” va transformatsiya “Yo‘l xaritasi”ga muvofiq 6 ta ustuvor yo‘nalishdagi 33 ta loyiha amalga oshirilmoqda.
Mijozlar uchun qulay va tezkor xizmatlar ko‘rsatishni yo‘lga qo‘yish maqsadida bank filiallarini ixcham bank xizmatlari markazlari va ofislariga aylantirish ishlari olib borildi. Hozirda hududlarda bankning 136 ta xizmat ko‘rsatish markazlari va ofislari hamda 437 ta 24/7 shoxobchalari orqali aholiga uzluksiz bank xizmatlari ko‘rsatilmoqda.
2023-yil 1-dekabr holatiga 1 mln 470 ming ta jismoniy shaxsga va 251 ming 532 ta yuridik shaxsga, yaʼni jami 1 mln. 722 ming nafar mijozga xizmat ko‘rsatilmoqda.
O‘tgan davrda 8 ta loyiha “BIG4” xalqaro konsalting kompaniyalari bilan amalga oshirildi.
Jumladan, joriy yil yakuniga qadar Ernst & Young kompaniyasi bilan risk menejment tizimini takomillashtirish ishlari yakuniga yetkaziladi.
Shuningdek, Deloitte & Touche kompaniyasi bilan Tavakkalchilikka asoslangan ichki audit, Korrupsiyaga qarshi nazorat, Ichki nazorat va sanksiyaviy komplaens tizimlarini takomillashtirish ishlarini tugatish maqsad qilingan.
Bankda KPI tizimi joriy qilinib, Bosh ofis va filial xodimlarini individual ko‘rsatkichlar asosida rag‘batlantirish amalga oshirilmoqda.
Joriy yilning aprel oyida mijozlarga yangi zamonaviy va raqobatbardosh MAVRID mobil ilovasi taqdim etildi. Ilova orqali 36 ta dan ortiq onlayn xizmatlardan foydalanish mumkin. Natijada bugungi kunda bankning mobil ilovalaridan foydalanuvchi mijozlari soni 418 mingdan ortiqni tashkil qilmoqda.
Bank Call – markazi zamonaviy dastur bilan taʼminlandi. Soft collection kreditlarni undiruv tizimi yo‘lga qo‘yildi, kredit qarzdorliklarni undirish bo‘yicha avtomat chiquvchi qo‘ng‘iroqlar amalga oshirish IVR dasturi joriy qilindi.
CRM, Skoring, BPM tizimlari amaliyotga tatbiq qilindi.
Bankda anderrayting tizimi joriy qilinib, jismoniy shaxslarga barcha kreditlar skoring tizimi orqali ajratilmoqda. Yuridik shaxslar uchun 24 turdagi modulli kreditlar joriy qilindi.
Bankning ixtiyoriy Xizmat ko‘rsatish markazlaridan turib o‘z hisob raqamlarini erkin tasarruf etish kabi qator qulayliklar yaratish maqsadida bank bo‘linmalari “Yagona MFO” tizimiga o‘tkazildi.
Tadbirda 2024-yilda bank tomonidan amalga oshiriladigan loyihar haqida ham atroflicha maʼlumotlar berildi.
Jumladan, yangi joriy qilingan mobil ilovaning imkoniyatlarini kengaytirish, KPI tizimini avtomatlashtirish, mijozlar ehtiyojlari va shikoyatlarini onlayn tarzda to‘plash, tezkor va sifatli xizmat ko‘rsatish uchun situatsion markaz tashkil qilish, kredit konveyerini yuridik shaxslar uchun to‘liq joriy qilish bo‘yicha gapirib o‘tildi.
Matbuot anjumani davomida “Mikrokreditbank” ATB masʼul xodimlari jurnalistlar tomonidan berilgan savollarga javob berishdi.
Reklama huquqi asosida.
Izoh (0)