Oliy Majlis Senatining qirq yettinchi yalpi majlisida Nogironlar assotsiatsiyasi raisi tomonidan qilingan murojaat ko‘rib chiqilgan edi. Unda qonunchilikda belgilangan bo‘lsa-da, assotsiatsiya va uning hududiy bo‘linmalari vakillariga qurilish obyektlarini qabul qilish masalasida maxsus elektron platformadan foydalanish imkoniyati cheklab qo‘yilgani tanqid qilingandi.
Aytilishicha, assotsiatsiya platformadan elektron kalit orqali to‘rt oycha foydalangan, lekin keyinchalik ulardan “kalit” olib qo‘yilgan.
Senat raisi Tanzila Norboyeva Vazirlar Mahkamasining vakolatli vakilidan mazkur masalani alohida nazoratga olib axborot kiritishni so‘ragandi.
Qurilish va uy-joy kommunal xo‘jaligi vazirligidan bir hafta muddatda mazkur masalani tegishli qonun talablari asosida uzil-kesil hal qilishni va ushbu masalaga javobgar bo‘lgan vakolatli xodimni masʼuliyatsizlik bilan yondashgani uchun rasman tushuntirish berishlarini biz talab qilamiz. Bir hafta muddatdan keyin shaxsan o‘zim shug‘ullanaman, — degandi Tanzila Norboyeva.
Holat yuzasidan “Daryo” muxbiri Qurilish va uy-joy kommunal xo‘jaligi vazirligi masʼullaridan izoh oldi.
Maʼlum qilinishicha, Nogironlar assotsiatsiyasi raisiga elektron kalit qaytarib berilgan va holat yuzasidan Vazirlar Mahkamasiga axborot kiritilgan.
Vazirlik nima sababdan elektron kalit olib qo‘yilgani va ushbu masalaga javobgar bo‘lgan vakolatli xodimga qanday chora ko‘rilgani bo‘yicha maʼlumot bermagan.
Izoh (0)