Andijon shahrida qarzdor kredit mablag‘ini to‘lamaganda, taniqli kafelardan biri sotilib ketishi mumkin edi, deb xabar bermoqda MIB axborot xizmati.
Qayd etilishicha, tadbirkorlikni rivojlantirish uchun olingan kreditlar o‘z vaqtida to‘lanmasa, qarzdorlikni qoplash uchun qo‘yilgan garovdagi mulk qo‘ldan ketishi mumkin. Buni kredit olgan tadbirkorlar yaxshi tushunsa-da, kredit shartnomasi shartlariga rioya qilmay, “so‘nggi nuqta”ni kutib turadi.
Fuqarolik ishlari bo‘yicha Bo‘ston tumanlararo sudining ijro hujjatida qarzdor “K.F.” MCHJ undiruvchi ATB “Ipoteka bank” Istiqlol filiali foydasiga 2,7 milliard so‘m kredit qarzini to‘lashi ko‘rsatilgan. Shu bilan birga, undiruvni garovdagi Andijon shahrida joylashgan “Savdo maishiy xizmat ko‘rsatish va umumiy ovqatlanish shoxobchasi” bino-inshootlariga qaratish belgilangan.
Byuroning Andijon shahar bo‘limi xodimlari ijro harakatlari olib borib, qarzdorlarga ogohlantirishlar bergan. Shunga qaramay, kredit qarzlari to‘lanmagach, shaharning taniqli va ko‘p sonli mijozlariga ega bo‘lgan ovqatlanish maskanlaridan biri bo‘lgan bino elektron onlayn-auksion savdosida sotish uchun chiqarildi.
Binoning boshlang‘ich sotuv narxi 3,5 milliard so‘m etib belgilangan edi. Sotuvga bir kun qolganida qarzdor jamiyat kredit qarzlarini to‘liq to‘lab yubordi. Undiruvchi bank bergan ma’lumotga ko‘ra, qarzdor ijro hujjatida ko‘rsatilgan muddati o‘tgan, foiz qarzdorliklari va penyalarni — jami 2,7 milliard so‘m qarzdorlikni to‘liq bartaraf etgan.
Izoh (0)