Buxoro viloyatining G‘ijduvon tumanida MIB xodimining xizmat vazifasini bajarishiga to‘sqinlik qilgan mushtumzo‘r fuqaroga jinoyat ishi qo‘zg‘atildi. Bu haqda viloyat prokuraturasi matbuot xizmati xabar berdi.
Aniqlanishicha, MIB G‘ijduvon tumani bo‘limi davlat ijrochisi Z.Z. ish yurituvida qarzdor “Fayzullo Xubiddin Fayz-bir” MCHJdan “Hududgazta’minoti” AJ foydasiga gaz bo‘yicha kommunal qarzdorlik hamda davlat foydasiga soliq va boshqa majburiy to‘lovlarni undirish haqidagi ijro ishi bo‘lgan.
Mazkur ijro ishi bo‘yicha ijro harakatlarini amalga oshirish uchun MIB xodimi 14-sentabr kuni qarzdor fuqaro M.F. xonadoniga borganida, u ijro harakatlarini amalga oshirishiga to‘sqinlik qilib, qo‘llari bilan xodimning yuz hamda badanining turli sohalariga qasddan urgan.
Bundan tashqari, yerda yotgan armatura bilan xodimning Lacetti mashinasi old, orqa, o‘ng yon tomon old va orqa oynalarini sindirib, orqa o‘rindig‘iga o‘t qo‘yib, qasddan shikast yetkazgan.
Mazkur harakatlari uchun qarzdor M.F. shu kunning o‘zida Jinoyat kodeksining 140-moddasi 3 - qismi “a” bandi, 173-moddasi 3-qismi “a” bandi va 219-moddasi 2-qismi bilan ishda ayblanuvchi tariqasida jalb qilinib, qamoqqa olish tarzidagi ehtiyot chorasi qo‘llangan.
Viloyat prokuraturasi tomonidan mazkur jinoyat ishi tergovi alohida nazoratga olingan.