Андижондаги тадбиркор қарзини узмагани учун таниқли кафелардан бири сотувга чиқарилди

Андижон шаҳрида қарздор кредит маблағини тўламаганда, таниқли кафелардан бири сотилиб кетиши мумкин эди, деб хабар бермоқда МИБ ахборот хизмати.

Қайд этилишича, тадбиркорликни ривожлантириш учун олинган кредитлар ўз вақтида тўланмаса, қарздорликни қоплаш учун қўйилган гаровдаги мулк қўлдан кетиши мумкин. Буни кредит олган тадбиркорлар яхши тушунса-да, кредит шартномаси шартларига риоя қилмай, “сўнгги нуқта”ни кутиб туради.

Фуқаролик ишлари бўйича Бўстон туманлараро судининг ижро ҳужжатида қарздор “К.Ф.” МЧЖ ундирувчи АТБ “Ипотека банк” Истиқлол филиали фойдасига 2,7 миллиард сўм кредит қарзини тўлаши кўрсатилган. Шу билан бирга, ундирувни гаровдаги Андижон шаҳрида жойлашган “Савдо маиший хизмат кўрсатиш ва умумий овқатланиш шохобчаси” бино-иншоотларига қаратиш белгиланган.

Бюронинг Андижон шаҳар бўлими ходимлари ижро ҳаракатлари олиб бориб, қарздорларга огоҳлантиришлар берган. Шунга қарамай, кредит қарзлари тўланмагач, шаҳарнинг таниқли ва кўп сонли мижозларига эга бўлган овқатланиш масканларидан бири бўлган бино электрон онлайн-аукцион савдосида сотиш учун чиқарилди.

Бинонинг бошланғич сотув нархи 3,5 миллиард сўм этиб белгиланган эди. Сотувга бир кун қолганида қарздор жамият кредит қарзларини тўлиқ тўлаб юборди. Ундирувчи банк берган маълумотга кўра, қарздор ижро ҳужжатида кўрсатилган муддати ўтган, фоиз қарздорликлари ва пеняларни — жами 2,7 миллиард сўм қарздорликни тўлиқ бартараф этган.