O‘zbekistonda qarg‘ish uchun javobgarlik belgilanayotgani haqida tarqalgan xabarlar rad etildi

Adliya vazirligi O‘zbekistonda qarg‘ish uchun javobgarlik belgilanayotgani haqida tarqalgan xabarlarni rad etdi.

Ijtimoiy tarmoqlarda “qarg‘ish uchun ham javobgarlik belgilanmoqda” mazmunidagi xabarlar tarqatilib, go‘yoki Normativ-huquqiy hujjatlar loyihalari muhokamasi portali (regulation.gov.uz)ga tegishli havola ham keltirib o‘tilgan.

Adliya vaziri matbuot kotibi Sevara O‘rinboyeva mazkur xabar haqiqatga to‘g‘ri kelmasligini, ushbu mazmundagi normativ-huquqiy hujjat loyihasi jamoatchilik muhokamasiga chiqarilmaganini bildirdi.

Uning qayd etishicha, Normativ-huquqiy hujjatlar loyihalari muhokamasi portali (regulation.gov.uz)ga joylashtirilgan loyihalarga tizim tomonidan avtomatik ravishda tegishli identifikatsiya (ID) raqami beriladi va ushbu ID raqam havolada aks etadi.

Xususan, Vazirlar Mahkamasining “Yilning eng namunali mahalla yoshlar yetakchisi”ni aniqlash bo‘yicha respublika tanlovini tashkil etish chora-tadbirlari to‘g‘risidagi qarori loyihasiga tizim tomonidan 83183 ID raqami berilgan va bu tegishli havolada ham aks etgan.

“Ijtimoiy tarmoq kanallari yurituvchilaridan yolg‘on va noxolis, tekshirilmagan axborotlarni jamoatchilikka tarqatish orqali fuqarolarimizda turli xil tushunmovchiliklarni keltirib chiqarishga yo‘l qo‘ymasliklarini so‘rab qolamiz”, — deyiladi raddiyada.