O‘zbekistonda 2023-yilning noyabri kuzatuvlar tarixidagi eng issig‘i bo‘ldi, deb xabar bermoqda “O‘zgidromet”.
Xabarga ko‘ra, havoning o‘rtacha statistik harorati keskin o‘zgarib turishi noyabr oyi uchun xosdir. Bunday o‘zgarib turishlar ushbu yilda ham kuzatildi. Ammo boshqa yillardan farqi, bu o‘zgarib turishlar yuqori harorat fonida sodir bo‘ldi. Oyning katta qismida havo harorati o‘rtacha ko‘p yillik qiymatlarga nisbatan yuqori bo‘ldi va faqat sovuq davrda iqlimiy me’yorgacha pasaydi.
Barcha hududlarda harorat o‘rtacha iqlimiy me’yordan 3-6 darajaga ko‘p bo‘ldi. 2023-yil noyabr oyi O‘zbekistonda meteorologik kuzatuvlarning barcha yillari uchun eng issiq noyabr oyi reytingida birinchi o‘rinni egalladi.
Eng issiq kunlarda maksimal havo harorati 23-28 daraja iliqqa yetdi. Minimal harorat faqat respublikaning shimolida salbiy qiymatlargacha pasaydi. O‘tgan yilning noyabr oyida respublika hududi bo‘yicha hech bir joyda maksimal havo haroratining rekord darajadagi yuqori ko‘rsatkichlari kuzatilmagan. Noyabr oyida mutlaq maksimal harorat 29-32 daraja iliqni, janubda 33-35 daraja iliqni tashkil etdi.
Noyabr oyining o‘ziga xos iqlimiy xususiyati — bu oyning boshidan uning oxirigacha haroratning tez pasayishi, chunki noyabr oyining oxiri qish mavsumiga o‘tishdir. Respublika hududining katta qismida oyning birinchi yarmida kunduzgi harorat odatda 15-20 daraja iliq, ikkinchi yarmida esa 10-15 daraja iliq atrofida bo‘ldi.
2023-yil noyabr oyida bunday tendensiyalar kuzatilmadi, oyning boshida ham, oxirida ham haroratning yuqori qiymatlari kuzatildi.
2023-yil noyabr oyi respublika bo‘yicha nisbatan quruq bo‘ldi. Respublika hududi bo‘yicha yog‘ingarchilik kam va me’yor atrofida bo‘ldi. Respublikaning tekislik hududi bo‘yicha yog‘ingarchilik faqat yomg‘ir ko‘rinishida yog‘di. Faqat respublikaning tog‘li hududlarida qor yog‘ishi kuzatildi.
Me’yorga nisbatan noyabr oyi 2023-yilning kuz mavsumidagi eng issiq oy (me’yordan 3-6 daraja iliq) bo‘ldi. Oktyabr oyida oyning o‘rtacha harorati me’yordan 1,5-2,5 darajaga yuqori, sentyabr esa o‘rtacha ko‘p yillik qiymatlarga yaqin bo‘ldi.
Umumiy olganda, 2023-yil kuzi O‘zbekistonda meteorologik kuzatuvlarning barcha yillari uchun eng issiq bo‘ldi. Ob-havo sharoitiga ko‘ra, bu haqiqatan ham baxmal mavsumi bo‘ldi.
Izoh (0)