O‘zbekistonda “Yil imomi-2023” ko‘rik tanlovi g‘olibiga haj safari yo‘llanmasi berildi. Bu haqda Musulmonlar idorasi axborot xizmati xabar berdi.
Ma’lum qilinishicha, shu yil 5-dekabr kuni masjidlarda faoliyat yuritayotgan imom-domlalar o‘rtasida “Yil imomi-2023” ko‘rik tanlovining respublika bosqichi bo‘lib o‘tdi. Unda Qoraqalpog‘iston, viloyatlar va Toshkent shahridagi hududiy bosqichlarda g‘oliblikni qo‘lga kiritgan 14 nafar imom-domla bellashdi.
Ishtirokchilar Qur’oni karim qiroati va tafsiri, aqida, fiqh, islom tarixi, hadis ilmlari, allomalar ijodiga oid savollarga javob berdi. Shuningdek, mehnat faoliyatlari davomida amalga oshirgan ishlari va ijodlarini namoyish etdilar. Qatnashchilarning chiqishlari hakamlar hay’ati tomonidan mezonlar asosida baholandi.
Tanlov natijalariga ko‘ra, quyidagi ishtirokchilar sovrinli o‘rinlarga munosib topildi:
- 1-o‘rin — Toshkent shahridagi “Xolid ibn Valid” jome masjidi imom-xatibi Isroiljon domla Ismoiljonovga I darajali diplom va haj safari yo‘llanmasi;
- 2-o‘rin — Andijon viloyatidagi “Mirzaxoliq ota” jome masjidi imom-xatibi Muhammadiyxon domla Hojiyevga II darajali diplom va 15 million so‘m pul mukofoti;
- 3-o‘rin — Samarqand viloyatidagi “Shayx Xudoydod Vali” jome masjidi imom-xatibi Anvar domla Ahmedovga III darajali diplom va 12 million so‘m pul mukofoti topshirildi.
Izoh (0)