Toshkent shahrida mobil aloqa kuchaytirgichlaridan noqonuniy foydalanib kelgan do‘kon aniqlandi, deb xabar beradi “O‘zkomnazorat” matbuot xizmati.
Ma’lum qilinishicha, 16-noyabr kuni “O‘zkomnazorat” inspeksiyasining Toshkent shahar hududiy bo‘limi, “EMMM” DUK hamda shahar Ichki ishlar bosh boshqarmasi bilan hamkorlikda poytaxt bo‘ylab monitoring tadbirlari o‘tkazilgan.
Tadbir davomida Shayxontohur tumani, G‘ofur G‘ulom ko‘chasi, 7-uy yerto‘lasida joylashgan do‘konda mobil aloqa kompaniyalari baza stansiyalarining sifatli ishlashiga xalaqit berayotgan mobil kuchaytirgich (repitor) qurilmasi aniqlangan.
“O‘zbekiston Respublikasi hududida mobil aloqa tarmoqlari signallarini kuchaytirib beruvchi retranslyator qurilmalaridan foydalanish to‘g‘risida”gi qarorga asosan, 500 megavattgacha bo‘lgan quvvatda boshqa radioelektron qurilmalarga radioxalaqit bermasligi va boshqa radioelektron vositasi aralashuvidan himoyani talab qilmaslik sharti bilan ishlatishga ruxsat etilgan.
Ammo yuqoridagi holatda qurilma mobil aloqa kompaniyalarining sifatli xizmat ko‘rsatishiga xalaqit bergani sababli Retail Trade East MCHJga qarashli do‘kon masʼuliga “Maʼmuriy javobgarlik to‘g‘risida”gi kodeksning 152-moddasi (radioelektron vositalar va yuqori chastotali qurilmalardan foydalanish tartibini buzish) 1-qismiga asosan maʼmuriy ish hujjatlari rasmiylashtirilib, Jinoyat ishlari bo‘yicha Shayxontohur tuman sudiga yuborilgan.
Izoh (0)