Tarmoqlarda Toshkent shahridagi 217-maktab direktorining o‘quvchini kaltaklagani aks etgan videoxabarlar tarqaldi. Toshkent shahar maktabgacha va maktab ta’limi boshqarmasi mazkur voqeaga munosabat bildirdi.
Aniqlanishicha, voqea 2023-yilning 19-sentyabr kuni sodir bo‘lgan.
Shu kuni 217-maktab 8-“B” sinf o‘quvchilari A.M. hamda Sh.I.lar sinfxonasida o‘zaro mushtlashib qolgan. A.M. sinfdoshining yuziga musht tushirib, tan jarohati yetkazgan. Bundan xabar topgan maktab ma’muriyati o‘quvchilarni direktor xonasiga chaqirgan. Maktab direktori Ya.Sh. ma’anaviy-ma’rifiy ishlar bo‘yicha o‘rinbosari G.X., Chilonzor tuman IIO FMB HPB VEMB inspektor psixologi, katta leytenant M.I. guvohligida o‘quvchilar bilan tushuntirish ishlari olib borgan. A.M. ga tanbeh berish chog‘ida maktab direktori jahl ustida uni so‘kib, kaltaklagan va tartibga chaqirgan, — deydi mas’ullar voqeaga izoh berar ekan.
Ta’kidlanishicha, mazkur voqea ortidan tuman hokimi o‘rinbosari, maktab ma’muriyati, o‘qituvchilar, IIB xodimlari va ota-onalar ishtirokida ham yig‘ilish o‘tkazilgan.
Ayni paytda yuqoridagi holat huquq-tartibot idoralari tomonidan o‘rganilmoqda, — deydi mas’ullar.
Boshqarma voqeaga munosabat berish barobarida pedagoglarga murojaat qilib, o‘quvchilarga zo‘ravonlik qilinishini qoralagan.
O‘quvchilarga nisbatan zo‘ravonlik ishlatish, jumladan, ularni haqoratlash, kaltaklash pedagog etikasiga to‘g‘ri kelmasligini, buning uchun qonunchiligimizda jazo choralari belgilab qo‘yilganligini yana bir bor eslatib o‘tamiz. Yuqoridagi kabi xunuk holat pedagog obro‘siga putur yetkazadi, xolos, — deyiladi boshqarma munosabatida.
Izoh (0)