Yevropa Ittifoqining ichki ishlar bo‘yicha komissari muhojirlarsiz Yevropa falaj bo‘lib qolishini aytdi

Ichki ishlar bo‘yicha Yevrokomissar Ilva Yoxansson fikricha, muhojirlarsiz Yevropa qiyin ahvolda qoladi.

U Ispaniyada qonuniy migratsiya bo‘yicha yuqori darajadagi konferensiyada shunday fikr bildirdi.

“Muhojirlarsiz Yevropa jabr ko‘radi, — dedi Yevropa komissari. — Agar muhojirlar Yevropa Ittifoqida ishlashni to‘xtatsa, Yevropa falaj bo‘lib qoladi”.

“Migratsiyani boshqarish mumkin, bu normal holat va bizni qo‘rqitmasligi kerak. Ha, muammolar va qiyinchiliklar bo‘lishi mumkin, ammo biz ularni yengishimiz mumkin, chunki bizga migratsiya kerak”, — deya aniqlik kiritdi Yoxansson.

Siyosatchining so‘zlariga ko‘ra, o‘tgan yili Yevropaga 3,5 million kishi qonuniy yo‘l bilan kirgan, yana 370 mingga yaqin odam esa noqonuniy yo‘l bilan chegarani kesib o‘tgan.

“Qonuniy ravishda kelganlarga e’tiroz yo‘q, ular muhojirlarning ko‘p qismini tashkil qiladi, aksariyati ishlash uchun kelgan va bu yo‘nalishni targ‘ib qilish kerak. Noqonuniy yo‘llarni minimallashtirish kerak”, — deb ta’kidladi Yoxansson.