O‘zbekistonning birinchi xonimi Ziroat Mirziyoyeva Turkiya birinchi xonimi Emine Erdo‘g‘on taklifiga binoan 15-noyabr kuni “Falastinda tinchlik uchun birgalikda” sammitida ishtirok etdi.
Istanbulda Emine Erdo‘g‘on raisligida o‘tgan davlat va hukumat rahbarlari rafiqalarining yig‘ilishida Malayziya malikasi Tunku Aziza, Bangladesh birinchi xonimi Rebekka Sulton, Bosniya va Gertsegovina birinchi xonimi Sabina Komshich, Qatar amirining onasi Shayxa Mo‘za bint Nosir al-Misnid, Livan bosh vaziri rafiqasi Mey Mikati, Pokiston bosh vaziri rafiqasi Sadiya Rahmatulloh va boshqa mamlakatlarning yuqori darajali vakillari ham qatnashdi.
Uchrashuv G‘azodagi tinch aholining azob-uqubatlariga chek qo‘yish va Falastin-Isroil nizosiga yechim topish yo‘lida qatʼiy birdamlikni namoyish etish maqsadida tashkil etildi.
Sammitda nutq so‘zlar ekan, Ziroat Mirziyoyeva qurolli to‘qnashuvlar oqibatida barcha qurbon bo‘lganlarning oila aʼzolari va yaqinlariga chuqur taʼziya va hamdardlik bildirdi. G‘azoda bir oydan ortiq vaqt davom etayotgan, ming-minglab insonlar, ayniqsa, begunoh bolalar, keksalar va ayollar umriga zomin bo‘layotgan dahshatli voqealarni hech narsa bilan oqlab bo‘lmasligini qayd etdi.
“Ming afsuski, xalqaro hamjamiyatning kuchli eʼtirozi va bosimiga qaramay, halokat va vayronagarchilik ko‘lami misli ko‘rilmagan darajada ortib, uning oxiri sira ko‘rinmayapti. Natijada qurolli to‘qnashuvlarga mintaqadagi yangi kuchlarning tortilish ehtimoli tobora kuchaymoqda”, — dedi u.
O‘zbekistonning birinchi xonimi G‘azo sektorida o‘t ochishni zudlik bilan to‘xtatishga chaqirdi.
“O‘zbekiston xalqi Falastinning tinch aholisi boshiga tushgan kulfat va qayg‘u-alamlarni yurakdan o‘tkazmoqda”, — dedi O‘zbekiston prezidentining rafiqasi.
Birinchi xonim har ikki tomonni ham zudlik bilan o‘t ochish va jangovar harakatlarni to‘xtatishga, tang ahvolda qolgan aholiga gumanitar yordam yetkazish uchun imkoniyat yaratishga, nizoni faqatgina tinch, diplomatiya yo‘li bilan “ikki xalq uchun ikki davlat” tamoyili asosida hal etishga chaqirib, O‘zbekistonning bu boradagi qatʼiy pozitsiyasini yana bir bor bildirdi.
.jpg)
O‘zbekiston Falastin xalqi bilan birdam va yakdil ekani, uning BMT rezolyutsiyalariga muvofiq o‘z mustaqil davlatini barpo etishga bo‘lgan huquqini to‘liq qo‘llab-quvvatlashi taʼkidlandi.
Sammit yakunida davlat va hukumat rahbarlari rafiqalarining G‘azo sektori bo‘yicha yig‘ilishi Yaxshi niyat deklaratsiyasi qabul qilindi.
Ziroat Mirziyoyeva haqida
O‘zbekistonning birinchi xonimi Ziroat Mirziyoyeva Mahmudovna 1964-yil 4-dekabrda Farg‘ona viloyati Qo‘qon shahrida tug‘ilgan. 1986-yilda Toshkent irrigatsiya va melioratsiya institutini (hozirda “Toshkent irrigatsiya va qishloq xo‘jaligini mexanizatsiyalash muhandislari instituti” Milliy tadqiqot universiteti) muhandis-iqtisodchi ixtisosligi bo‘yicha tamomlagan.
2020-yildan buyon O‘zbekistonda ochiq va inklyuziv muhitni yaratish orqali aholining yordamga muhtoj qatlamlarini ijtimoiy himoya qilish, sog‘liqni saqlash va taʼlimni rivojlantirish masalalari bo‘yicha qator xayriya loyihalarini amalga oshirayotgan “Zamin” xalqaro jamoat fondi Vasiylik kengashi raisidir.
Fond faoliyatining ustuvor yo‘nalishi atrof-muhitni muhofaza qilishdan iborat. Ko‘kalamzorlashtirish, havo sifati monitoringini avtomatlashtirish, tabiiyresurslardan oqilona foydalanish, yoshlar orasida ekologik taʼlimni rivojlantirish, olis hududlarda toza ichimlik suvi bilan taʼminlash kabi masalalar bo‘yicha loyihalar amalga oshirilmoqda.
Ziroat Mirziyoyeva ijtimoiy va ekologik sohalardagi dolzarb masalalarga ko‘proq eʼtibor qaratish maqsadida ham milliy, ham xalqaro darajada qator tadbirlarni o‘tkazmoqda.
Izoh (0)