Toshkentning bir nechta ko‘chalari 2 kunga yopiladi — xarita

Toshkent shahrining bir nechta ko‘chalari musobaqalar sabab 2 kunga yopiladi. Bu haqda poytaxt hokimligi axborot xizmati xabar berdi. 

Ma’lum qilinishicha, 19-noyabr kuni Davlat bayrog‘i kuni va Konstitutsiya kuniga bag‘ishlangan “Yangi nafas” hamda “Ekiden” xalqaro ommaviy yugurish musobaqalari bo‘lib o‘tadi. Tadbirlar munosabati bilan shahrimizning bir necha ko‘chalari vaqtincha yopiladi.

• 17-noyabr kuni soat 00:00 dan 19-noyabr kuni soat 12:00 gacha:

Afrosiyob ko‘chasining Islom Karimov ko‘chasi bilan kesishmasidan Beshyog‘och ko‘chasi bilan kesishmasigacha bo‘lgan qismi;

• 19-noyabr kuni soat 06:30 dan 09:30 gacha:

Afrosiyob ko‘chasining Islom Karimov ko‘chasi bilan kesishmasidan boshlab Oybek, Nukus va Abdulla Qodiriy ko‘chalari.

Haydovchilarga aylanma yo‘llardan foydalanish tavsiya etilgan.