O‘zbekistonga jismoniy shaxslar tomonidan mobil qurilmalarni olib kirishda bojxona to‘lovlari undirilmaydigan cheklangan me’yorlaridan qat’iy nazar, deklaratsiya to‘ldiriladi. Bu haqda Vazirlar Mahkamasining 26-oktyabrdagi qarorida belgilandi.
Qaror bilan O‘zbekiston hududida foydalanilayotgan, sotish yoki shaxsiy foydalanish uchun olib kiriladigan mobil qurilmalarni ro‘yxatga olish tartibi yanada takomillashtirilishi munosabati bilan hukumatining ayrim qarorlariga o‘zgartirish va qo‘shimchalar kiritildi.
Unga ko‘ra, endi havo yo‘llari orqali respublikaga kirib kelayotgan jismoniy shaxslar har kelganlarida ikki dona telefon apparati, shu jumladan, mobil aloqa moduliga ega bo‘lgan mobil telefonlar va qurilmalarni bojxona to‘lovlarisiz olib kirishlari mumkin.
Bunda ushbu tovarlarning qiymati respublikaga aviatsiya o‘tkazish punktlari orkali olib kirishda jismoniy shaxslar uchun bojxona to‘lovlariga tortilmaydigan tovarlarning cheklangan qiymati — 2000 AQSH dollari tarkibiga kiritiladi.
Yaʼni jismoniy shaxsning yonida olib kirgan barcha tovarlari, shu jumladan, telefonlarning umumiy qiymati 2000 AQSH dollaridan oshgan taqdirda belgilangan tartibda bojxona to‘lovlari undiriladi.
Jismoniy shaxslar tomonidan mobil qurilmalarni olib kirishda bojxona to‘lovlari undirilmaydigan cheklangan meʼyorlaridan qatʼiy nazar, deklaratsiya to‘ldiriladi.
Qaror bilan norezidentlarga tegishli mobil qurilmalar IMEI-kodlarining kulrang ro‘yxatda bo‘lish muddati 30 kundan 60 kungacha uzaytirildi. Shuningdek, import qiluvchilar tomonidan olib kirilayotgan mobil qurilmalarning bojxona rasmiylashtiruvi tizimi takomillashtirildi.
Endi import qiluvchilar tomonidan olib kirilgan qurilmalar partiyasi “erkin muomalaga chiqarish” (IM-40) bojxona rejimiga rasmiylashtirilmaguncha, mazkur qurimalalarning IMEI kodlari tizimda ro‘yxatdan o‘tkazilishiga yo‘l qo‘yilmaydi.
Jismoniy shaxslar tomonidan xalqaro pochta yoki kuryerlik jo‘natmalari orqali olib kiritilgan mobil qurilmalar tizim operatori yoki ro‘yxatga oluvchisiga shaxsan murojaat etish orqali yoki tizim operatorining sayti orqali, mos ravishda pochta identifikatorining shtrix kodi, kalendar shtempeli bo‘lgan konvert va jo‘natmani oluvchining JSHSHIR mavjud shaxsni tasdiqlovchi hujjatini ko‘rsatgan holda amalga oshiriladi.
Izoh (0)