Ўзбекистонга жисмоний шахслар томонидан мобил қурилмаларни олиб киришда декларация тўлдирилади

Ўзбекистонга жисмоний шахслар томонидан мобил қурилмаларни олиб киришда божхона тўловлари ундирилмайдиган чекланган меъёрларидан қатъий назар, декларация тўлдирилади. Бу ҳақда Вазирлар Маҳкамасининг 26 октябрдаги қарорида белгиланди.

Қарор билан Ўзбекистон ҳудудида фойдаланилаётган, сотиш ёки шахсий фойдаланиш учун олиб кириладиган мобил қурилмаларни рўйхатга олиш тартиби янада такомиллаштирилиши муносабати билан ҳукуматининг айрим қарорларига ўзгартириш ва қўшимчалар киритилди.

Унга кўра, энди ҳаво йўллари орқали республикага кириб келаётган жисмоний шахслар ҳар келганларида икки дона телефон аппарати, шу жумладан, мобил алоқа модулига эга бўлган мобил телефонлар ва қурилмаларни божхона тўловларисиз олиб киришлари мумкин.

Бунда ушбу товарларнинг қиймати республикага авиация ўтказиш пунктлари оркали олиб киришда жисмоний шахслар учун божхона тўловларига тортилмайдиган товарларнинг чекланган қиймати — 2000 АҚШ доллари таркибига киритилади.

Яъни жисмоний шахснинг ёнида олиб кирган барча товарлари, шу жумладан, телефонларнинг умумий қиймати 2000 АҚШ долларидан ошган тақдирда белгиланган тартибда божхона тўловлари ундирилади.

Жисмоний шахслар томонидан мобил қурилмаларни олиб киришда божхона тўловлари ундирилмайдиган чекланган меъёрларидан қатъий назар, декларация тўлдирилади.

Қарор билан норезидентларга тегишли мобил қурилмалар IMEI-кодларининг кулранг рўйхатда бўлиш муддати 30 кундан 60 кунгача узайтирилди. Шунингдек, импорт қилувчилар томонидан олиб кирилаётган мобил қурилмаларнинг божхона расмийлаштируви тизими такомиллаштирилди.

Энди импорт қилувчилар томонидан олиб кирилган қурилмалар партияси “эркин муомалага чиқариш” (IМ-40) божхона режимига расмийлаштирилмагунча, мазкур қурималаларнинг IMEI кодлари тизимда рўйхатдан ўтказилишига йўл қўйилмайди.

Жисмоний шахслар томонидан халқаро почта ёки курерлик жўнатмалари орқали олиб киритилган мобил қурилмалар тизим оператори ёки рўйхатга олувчисига шахсан мурожаат этиш орқали ёки тизим операторининг сайти орқали, мос равишда почта идентификаторининг штрих коди, календарь штемпели бўлган конверт ва жўнатмани олувчининг ЖШШИР мавжуд шахсни тасдиқловчи ҳужжатини кўрсатган ҳолда амалга оширилади.