Nigerning hokimiyatdan ag‘darilgan prezidenti Muhammad Bazum hibsdan “qochishga” urindi, deb xabar bermoqda AFP mamlakatda hokimiyatni qo‘lga olgan isyonchilar vakili, mayor polkovnik Amadu Abdramanga tayanib.
Rejim vakilining aytishicha, prezident 19-oktyabr oqshomida qochishga uringan, biroq harbiylar tomonidan to‘xtatilgan. U oilasi, ikki oshpaz va ikki xavfsizlik xodimi bilan birgalikda “qamoqxonadan qochishga urindi” deydi Abdraman.
“Asosiy aybdorlar va Bazumning ba’zi sheriklari qo‘lga olindi”, — deb qo‘shimcha qildi xunta vakili.
Abdramanning so‘zlariga ko‘ra, rejada dastlab Bazumni Niamey chekkasidagi yashirin joyga olib borish, keyin esa uni olib ketishga “xorijiy kuchga tegishli vertolyotlar”ni jo‘natish bor bo‘lgan.
Iyul oyining oxirida isyonchilar tomonidan tuzilgan “Vatanni qutqarish milliy kengashi” Bazumni hokimiyatdan olib tashladi. U hibsga olindi. Isyonchilar Bazumni davlatga xiyonatda va mamlakat xavfsizligiga putur yetkazishda aybladi.
Xunta, agar boshqa davlatlar Nigerga bostirib kirishga harakat qilsa, prezidentni o‘ldirish bilan tahdid qildi. Nigerning AQSHdagi elchisi aytishicha, Bazumga oziq-ovqat, elektr toki va ovqat pishirish uchun gaz berilmagan, u o‘z uyining qorong‘u yerto‘lasida saqlanmoqda.
“Xunta rahbarining rejasi uni ochlikdan o‘ldirish”, — dedi diplomat.
Associated Press xabariga ko‘ra, isyonchilar 12-avgust kuni birinchi marta shifokorga prezident huzuriga kirishga ruxsat bergan.
Izoh (0)