Hojiboy Tojiboyevning vorisi qiziqchining hajviyalaridan ruxsatsiz foydalangan radio ustidan shikoyat qildi

So‘z ustasi Hojiboy Tojiboyevning mualliflik huquqi uning vorisi — qizi Intizor Tojiboyeva tomonidan himoyalangan. Bu haqda Adliya vazirligi Intellektual mulk departamenti axborot xizmati xabar berdi. 

Qayd etilishicha, O‘zbekiston Respublikasi qonunchiligiga muvofiq mualliflik huquqi muallifning vafotidan so‘ng asar e’lon qilinganidan keyin yetmish yil davomida huquqiy himoyaga ega bo‘ladi.

Shu bois O‘zbekiston Respublikasi va Tojikiston Respublikasida xizmat ko‘rsatgan artist, so‘z ustasi marhum Xodjimurod Todjiboyevning (Hojiboy Tojiboyev) mualliflik huquqlarini himoya qilish maqsadida uning vorisi Intizor Tojiboyeva mulkiy huquqlarni jamoaviy asosda boshqaruvchi tashkilot orqali Adliya vazirligiga murojaat qilgan, — deyiladi departament axborotida.

Qo‘shimcha qilinishicha, “R.R.S.” MCHJga tegishli bo‘lgan “N” radiokanalida tekshiruv o‘tkazilgan va tekshiruv davomida Hojiboy Tojiboyevning hajviyalari muallifning merosxo‘ri bo‘lgan Intizor Tojiboyevaning ruxsatisiz radio efirlarida yangragan. 

Ushbu holat bo‘yicha “R.R.S.” MCHJga qonun hujjatlari buzilishi, ularning sabablari va bunga olib keluvchi shart-sharoitlarni bartaraf etish to‘g‘risida taqdimnoma kiritilib, huquqbuzarlik bartaraf etildi. Mualliflik huquqi obektlaridan muallif (uning vorisi) yoki mulkiy huquqlarni jamoaviy asosda boshqaruvchi tashkilotlar bilan tuzilgan shartnoma asosida foydalanilishi lozim, — deydi dapartament mas’ullari.