Toshkentda 2023-yil 18—19-oktyabr kunlari Where in the World is Tashkent konferensiyasi o‘tkazilmoqda. Bu haqda prezident yordamchisi Saida Mirziyoyeva o‘z sahifasida yozib qoldirdi.
Ushbu tadbir poytaxtning modernistik qiyofasini saqlab qolish bo‘yicha boshlangan Tashkent Modernism XX-XXI loyihasining eng yuqori nuqtasidir.
“Diyorimiz betakror arxitektura anʼanalari saqlanib qolgan yurtdir. Xorazmning qadimiy qalʼalaridan to temuriylar bunyod etgan madrasalar va mahallalarimizning odatiy meʼmorchiligida qo‘llangan ixtirolargacha — ushbu boy merosni qadrlaymiz va undan faxrlanamiz.
⠀
Biroq, ko‘p asrlik merosimizni targ‘ib qilar ekanmiz, shaharlarimiz, xususan, Toshkentga chiroy baxsh etib turgan o‘ziga xos XX asr modernizmi ruhidagi arxitekturani ham nazardan chetda qoldirmasligimiz kerak. Toshkentning modernistik binolari uni Xelsinki yoki Bilbao singari mashhur modernizm qiyofasidagi namunalar qatoriga qo‘shadi.
⠀
Ushbu loyiha mamlakatimiz va xorijiy ekspertlar o‘rtasida fikrlar, g‘oyalar almashinuviga xizmat qiladi, shahrimizni asrab-avaylash bo‘yicha kompleks dastur ishlab chiqishiga hissa qo‘shadi deb ishonaman”, — deydi Saida Mirziyoyeva.
Izoh (0)