Иқтисодчиси Юлий Юсупов Ўзбекистонда иссиқхоналар газдан кўмирга ўтаётгани ҳақида фикр билдириб, бу кўплаб ишлаб чиқариш объектларини рентабелликка олиб келиб ва уларни ёпишга сабаб бўлишини айтди. Қишлоқ хўжалиги вазирлиги бунга муносабат билдирди.
Вазирлик иқтисодчининг “Ўзбекистондаги иссиқхоналар фалокат ёқасида” сарлавҳаси остида билдирган фикрларини бирламчи тахмин ҳамда асосга эга бўлмаган фикрлар жамланмаси деб атади.
Қайд этилишича, бугунги кунда мамлакатимиз аҳолисини сифатли озиқ-овқат маҳсулоти билан таъминлаш мақсадида иссиқхоналар майдони сўнги 5 йилда 3 баробарга кўпайиб, 5,2 минг гектарга етди, уларда етиштирилаётган маҳсулотлар ҳажми 90 минг тоннадан 300 минг тоннага кўпайди.
Энергетика вазирлиги томонидан куз-қиш мавсумида аҳоли газ тармоқларига уланмаган иссиқхона хўжаликларига табиий газ етказиб бериш бўйича шартнома тузиш ишлари бошланди.
Хусусан, иссиқхона хўжаликлари молиявий аҳволини яхшилаш ва ривожлантириш бўйича республика ишчи гуруҳининг 3 та йиғилиш баёнлари қабул қилиниб, иссиқхона хўжаликлари томонидан олинган 87 фоиз кредит маблағларининг муддати 14 йилгача узайтирилди.
“Танқидий руҳда тарқатилган хабарлар эса, бирламчи тахмин ҳамда асосга эга бўлмаган фикрлар жамланмаси. Гап-сўзлар ва миш-мишлар негизида шаклланган ушбу изоҳларни аниқ далили бор манбага айлантиришга уриниш жоиз эмас”, — дейилади вазирлик муносабатида.
Шунингдек, вазирлик фуқароларнинг мурожаатлари, шунингдек, соҳада олиб борилаётган ислоҳотларни қўллаб-қувватлаш, муаммоларни ўрганиш ва бартараф этиш юзасидан очиқ мулоқотга ҳар доим тайёрлиги билдириб ўтилган.
“2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисида”ги президент қарорида 2023 йилда 5407 та ижтимоий объект, 1 147 та иссиқхона, 250 та қурилиш материаллари ишлаб чиқарувчи корхона иситиш тизими кўмир ёқилғисига ўтказилиши белгиланганди.
Ихтиёрий равишда кўмир ёқилғисида ишлайдиган иссиқхоналарга давлат томонидан рағбатлантириш пакети жорий қилинади.
Изоҳ (0)