Saudiya Arabistoni rasmiylari Isroil bilan munosabatlarni normallashtirish bo‘yicha kelishuvni tayyorlash bo‘yicha muzokaralarni keyinga qoldirdi. Bu haqda manbalarga tayanib, Reuters va Bloomberg xabar berdi.
Nashrlardagi ma’lumotlarga ko‘ra, Saudiya Arabistoni o‘z pozitsiyasini Saudiya—Isroil munosabatlarini normallashtirish bo‘yicha muzokaralarni qo‘llab-quvvatlovchi AQSH rasmiylariga yetkazgan. Bloomberg manbalarining qayd etishicha, rasmiy Ar-Riyod bu qadamni diplomatik muzokaralarning yakuni sifatida emas, balki pauza sifatida baholagan.
Ismi oshkor etilmagan amerikalik amaldor Bloomberg’ga Oq uy Saudiya Arabistoni rasmiylari bilan aloqada ekanini va tashabbus to‘xtatilgani haqida ma’lumot olmaganini aytdi. Shu bilan birga, AFP manbasi Ar-Riyod bu haqda Vashingtonni xabardor qilganini aytdi.
Saudiya Arabistoni hukumati jurnalistlarning so‘rovlariga javob bermadi.
7-oktyabr kuni HAMAS Isroilga hujum qilishidan oldin Isroil va Saudiya Arabistoni rahbarlari kelishuv sari harakatlanishga ishonch bildirishgan edi.
Munosabatlarni normallashtirish kelishuvi Saudiya Arabistoni Isroilni tan olishini hamda u bilan diplomatik va savdo aloqalarini boshlashini nazarda tutadi. Bunga javoban Saudiya Isroildan falastinliklarga yon berishni, AQSHdan esa xavfsizlik kafolatlari va yadro dasturida yordam olishni istaydi, deb yozgan The Wall Street Journal avgust oyida. Nashr manbalarining aytishicha, Ar-Riyod va Vashington kelishuvning umumiy konturlari bo‘yicha kelishib olgan.
G‘arb matbuoti Saudiya Arabistoni va Isroil o‘rtasidagi munosabatlarni normallashtirish bo‘yicha kelishuv Yaqin Sharqda so‘nggi o‘n yilliklardagi eng muhim tinchlik kelishuvi bo‘lishini ta’kidlamoqda.
Arab dunyosining aksariyat davlatlari hamon Isroilni tan olishdan bosh tortadi. 1979-yilda Misr Isroilni tan olgan birinchi arab davlatiga aylangandi. Iordaniya 1994-yilda, Bahrayn va Birlashgan Arab Amirliklari esa 2020-yilda shunday qilgan.
Izoh (0)