2018-yili tashkil etilgan “Bravo” kulgi jamoasi qisqa vaqtda o‘z muxlislarini topishga, O‘zbekiston poytaxtidan to viloyatlarigacha va dunyoning ko‘plab mamlakatlarida konsert berishga ulgurgan. Kulgi jamoasining bu yilgi konsert dasturi 14—21-oktyabr kunlari “Xalqlar do‘stligi” sanʼat saroyida bo‘lib o‘tadi. Xo‘sh, kulgi jamoasi yangi dasturga qanday tayyorgarlik ko‘rmoqda? “Daryo” muxbiri Nargizaxon Murodova bu savolga javob olish maqsadida ularning tayyorgarlik jarayonlarida ishtirok etdi.
— Har yilgi konsertga alohida tayyorgarlik ko‘ramiz. Sir emas, kulgi jamoalari o‘rtasida ham raqobat kuchaygan, vaynerlar ham qizg‘in ishlayapti. Shu bois doim aʼlo darajada tayyorgarlik ko‘rishga va tesha tegmagan mavzularni sahnaga olib chiqishga harakat qilamiz.
Tayyorgarlik jarayonlari oqshom boshlanib, to tongga qadar davom etyapti. Deyarli uyqu yo‘q, desa ham bo‘ladi. Repetitsiyani kunduzi qilishga ham harakat qildik, ammo ko‘pchilik ijoddan tashqari tadbirkorlik va davlat ishida ishlagani uchun kechqurun ishlash bizga ancha qulayroq ekan. Ishdan keyin xotirjam yig‘ilib ishlaymiz.
Bu yilgi konsertimizning avvalgilariga nisbatan masʼuliyati juda yuqori. Sababi bu yil konsertimiz to‘liq jonli ijroda o‘tkaziladi. Avvalgilarida ham hazillar jonli ijroda bo‘lgan, ammo sahna ko‘rinishlari orasidagi musiqalar dijey tomonidan boshqarib boriladi. Bu yilgi konsertda esa orkestr bilan ishlayapmiz va 10 dan ortiq sozandalar musiqalarni jonli ijro etishadi, — deydi “Bravo” kulgi jamoasi aʼzosi Umid Umarov.
“Kulgi jamoalari uchun jonli ijroda konsert berish qanchalik muhim?” degan savolimizga jamoa aʼzosi Otabek Mirzaxolov quyidagicha javob berdi.
— Fonogrammadan foydalanganimiz biz uchun qulay, ammo jonli ijroda bo‘lishi ham qiziq bo‘larkan. Faqat masʼuliyati shundaki, orkestr ham biz bilan tengma-teng ishlashi kerak. Bu qarorga kelishimizga jonli ijroda o‘tkaziladigan konsertlar saroy arendasining yarmi chegirma qilinishi sabab bo‘ldi. Sir emas, biz konsertlarni o‘zimiz moliyalashtiramiz. Sakkiz kunlik sanʼat saroyining ijara puli ozmuncha bo‘lmaydi, — deydi Otabek Mirzaxolov.
O‘tgan yili Shahlo Zoirovaning jamoani tark etgani muxlislar uchun kutilmagan yangilik bo‘ldi. Uning o‘rniga aktrisa Nargiza Salmonova va Durdona Qurbonovalar jamoaga qabul qilingandi. Ammo bu yilgi tayyorgarlik jarayonlarida faqatgina Durdona Qurbonovani uchratdim.
— Nargiza Salmonova farzandli bo‘ldi va oilasi bilan xorijda yashaydi. Shu bois navbatdagi konsertda faqatgina Durdona Qurbonova va yordamchi rollarda bir-ikkita qizlar ishtirok etishadi xolos. O‘zi yigitlar bilan maslahatlashgan holda qizlar rolini kamaytirmoqchimiz. Hazil-huzulni erkaklar qilgani maʼqul, degan qarorga keldik.
Shahlo Zoirovaning ijodini hamisha kuzatib boramiz. Ishlari avjida, unga faqat omad tilaymiz, — deydi Umid Umarov.
Shu kungacha Shahlo Zoirova nega jamoani tark etgani ochiqlangani yo‘q. Agar jiddiy kelishmovchilik bo‘lmaganida ular ayro ijod qilmagan bo‘lardi. Bu savolga Umid Umarov quyidagicha javob berdi.
— Jamoa bilan ishlash juda qiyin. Chunki har kimning o‘ziga yarasha feʼl-atvori bor. Baʼzida yaxshi fikrlar ham bir-biri bilan qarama-qarshi bo‘lib qoladi. Shahlo Zoirovaning qaytishini xohlaymiz, chunki uning o‘rni boshqacha. Agar mablag‘ tomonlama aytadigan bo‘lsak, u yuqori darajaga chiqdi. U bir kunning o‘zida 3-4 ta xonadonning xizmatida bo‘lyapti. Konsert tizimi esa boshqacha. 15 kun tinimsiz har kunlik tayyorgarlik jarayonlari, undan keyin konsert. Xullas, hammamiz sahnadagi tayyorgarlik va konsert jarayonlari bilan bir oy band bo‘lamiz. Shahlo esa tinimsiz xalq xizmatida, — deydi Umid Umarov.
Videoni to‘liq holda tomosha qilishni istasangiz:
Izoh (0)