O‘zbekistonda sentyabr oyi oxiriga kelib ikkilamchi bozorda avtomobillar narxi tushayotgani haqida xabarlar tarqaldi. Ulardan birida aytilishicha, mashina bozorida narxlar keskin tushishi kuzatilmoqda.
Narx-navo “tashlayapti”. Mayli, tushaversin. Akajon, kambag‘al ham mashina minsin. Bizlarga narxi qancha tushsa, shuncha yaxshi. Iloji bo‘lsa, mashina olmanglar. Bular 15-18 ming dollarga arziydigan mashinalar emas. To‘g‘risini aytgan yaxshi, iloji bo‘lsa olmanglar, og‘aynilar. Tushsin narx-navo. 10 ming bo‘lsin. Maza qilib olib mininglar, bizlar ham maza qilib sotaylik, — deydi mashinalar savdosi haqida fikr bildirgan avtomobil bozoridagi kishi.
Iqtisodchi Otabek Bakirov ham o‘zining Telegram kanalida sentyabr oyi oxirida eʼlon qilgan postida ikkilamchi avtomobil bozorida narxlar tusha boshlaganiga urg‘u bergan.
“Oxirgi ikki haftadagi kuzatuvlar shuni ko‘rsatmoqdaki, ikkilamchi avtomobil bozorida eng likvid hisoblangan Lacetti, Cobalt va Damas avtomobillari narxida sezilarli darajada pasayish yuz bermoqda.
Sentyabr boshida yangi Lacetti preyskurant va bozor narxida 5-6 ming dollarlik farq bo‘lgan bo‘lsa, hozir bu farq uzog‘i 3-4 ming dollargacha qisqargan, yangi Cobalt narxidagi farqlar 5-6 ming dollardan 4-5 ming dollargacha, yangi Damas narxidagi farqlar esa 3-3,5 ming dollardan 2,5-3 ming dollargacha pasaygan. 2022-yilgacha ishlab chiqarilgan avtomobillar narxida ham 10 foiz atrofida pasayish tendensiyasi mavjud”, deb yozadi iqtisodchi.
Otabek Bakirov mazkur jarayonni uch omil bilan: birinchisi, avgustdagi qo‘shimcha yangi avtomobillar bozorga faol olib chiqilayotgani, ikkinchidan, avgust oyidan boshlab banklar avtokredit berish talablarini ancha qattiqlashtirgani, uchinchidan esa pul o‘tkazmalari qisqarayotgani va narxlar dollarda belgilanishi bilan bog‘lamoqda.
Haqiqatan ham ikkilamchi bozorda avtomashinalar narxi tushmoqdami? Buni o‘rganish maqsadida “Daryo” muxbiri Toshkent shahridagi Sergeli avtomobil bozoridan reportaj tayyorladi.
Bozorda 20 yildan buyon avtomobil savdosi bilan shug‘ullanuvchi Komil Yo‘ldoshevning aytishicha, haqiqatan ham narxlar tushgan.
“Masalan, avval Tracker’ning premier versiyasi 26 ming dollardan sotilayotgan bo‘lsa, hozir 22 ming dollardan sotuvda turibdi, hatto 21,5 ming dollarga ham bor. Malibu ham tushgan, avval 34 ming dollar deb sotilayotgani 32 mingdan sotilmoqda”, — dedi u.
Komil Yo‘ldoshevning taʼkidlashicha, avtomobillarning narxi tushishi valyuta kursining ko‘tarilishi va ayrim banklarda avtokerditlarning yopilgani bilan bog‘liq.
Yana bir sotuvchi Ikrom Ibrohimovning aytishicha, narxlarning tushishi UzAuto Motors tomonidan avtomobillar uchun shartnomalar tuzib, egalariga tezroq yetib borayotgani bilan bog‘liq.
“Ikki oydan beri savdo yo‘qligining hisobidan narxlar “qaytib” qoldi. UzAuto Motors shartnomalarni qancha ochaversa, narx shuncha tashlayveradi. Hammasi UzAuto Motors’ga bog‘liq. Agar shartnomani yopib qo‘ysa, narx-navo ham “osmon”ga ko‘tariladi. Mana shunaqa tez-tez to‘lab, bir oyda mashina beraversa, narxlar bundan ham pastga tushib ketaveradi.
Guvohi bo‘lganimiz, Gentra’lar 18 ming dollar edi, hozir 15 ming dollardan beryapti. Malibu’ni 30 ming dollardan sotayotgandik, hozir 27 ming dollardan sotyapmiz. Kerak bo‘lsa zarariga ham bermaymiz. Misol uchun: Jetour mashinasini 3,5-4 ming dollar zarariga ham sotdik. Monza’lar narxi tushib ketdi”, — dedi sotuvchi.
Yana bir suhbatdoshning alohida taʼkidlashicha, narxlar asosan yangi avtomashinalar bilan ko‘proq farqlanmoqda. Eski mashinalarda esa katta o‘zgarish sezilmagan.
“Avtosalonlarda shartnoma ochilgandan beri eski Cobalt narxi 500 dollarga tushdi. Lekin juda tushib ketgani yo‘q. Yangi mashinalar biroz arzonlashdi”, – dedi sotuvchi Fayzulla Ahmedov.
Asosan Cobalt savdosi bilan shug‘ullanuvchi Shavkat Odilovning maʼlum qilishicha, yangi Cobalt 16 ming dollardan 13 ming dollarga tushgan. Bozor va avtosalon narxi bir-biriga yaqinlashib qolgan, o‘rtada 1000-500 dollar atrofida farq bor.
Xo‘sh, elektromobillarchi? Ularda ham narxlar arzonlamoqdami? Ushbu savolga javob olish maqsadida “Daryo” muxbiri elektromobillar bo‘yicha ekspert Mirzohid Hamroyevdan izoh oldi.
“Elektromobil bozorida ham narxlar arzon bo‘lyapti. Birdaniga 3-4 mingga arzon bo‘lgani yo‘q, lekin sezilarli darajada arzonlashdi. Taxminan, 500-1000 dollar atrofida arzonlashyapti. Menimcha, bu to‘xtaydi. Butunlay arzon bo‘lib ketmaydi. Chunki oldin ham BYD Song Plus boshida 43-44 ming dollar edi. Oxiri taqalib 37 ming dollarga to‘xtab qoldi, undan tushmadi. Keyin yangi BYD Tang chiqqandan keyin uning narxi 34 ming dollarda to‘xtadi, boshqa tushadigan joyi yo‘q”, — dedi Mirzohid Hamroyev.
UzAuto Motors rasmiy saytida 18-sentyabr kuni Chevrolet Cobalt, Lacetti, Damas va Labo avtomobillari uchun shartnomalar tuzish boshlangani eʼlon qilgandi. O‘sha kunning o‘zida Cobalt, Lacetti uchun shartnomalar tugagani ma’lum qilingan. Ish vaqti tugadi degan vaj bilan barcha avtosalonlarda shartnoma berish to‘xtatilgandi.
Shartnomalar tezda tugab qolgani bois shartnoma ololmagan xaridorlar “Daryo” jurnalisti bilan suhbatda “Avtosalonlar o‘nta mashina sotib, salonni yopsa, nega eʼlon beradi” degan mazmunda UzAuto Motors’ga savollar yog‘dirgandi.
Izoh (0)