Saul Alvares to‘liq 12 raund davom etgan jangda Jermell Charlo ustidan g‘alaba qozondi

AQSHning Las-Vegas shahrida 1-oktabr, yakshanba tongida professional boks musobaqasi bo‘lib o‘tdi.

Uning markaziy jangi meksikalik Saul “Kanelo” Alvares (60-2-2) hamda amerikalik Jermell Charlo (35-2-1) o‘rtasida kechdi. 

Jang to‘liq 12 raund davom etdi va unda Saul Alvares hakamlarning yakdil qarori bilan g‘alaba qozondi (119-108, 118-109, 118-109). Bundan tashqari, Saul jangning 7-raundida Charloni nokdaun holatiga ham tushirdi. 

Shu tariqa, jangda g‘alaba qozongan Saul Alvares ikkinchi o‘rta vazndagi IBF, WBA, WBC va WBO kamarlarini muvaffaqiyatli himoya qildi.

Musobaqaning boshqa janglari natijalari:

• Yordenis Ugas (27-6) Mario Barriosga (28-2) imkoniyatni boy berdi;
• Xesus Ramos (20-1) Erikson Lyubinga (26-2) hakamlar qaroriga ko‘ra yutqazdi;
• Elayja Garsiya (16-0) Armando Resendizni (14-2) 8-raundda nokautga uchratdi.