Namanganda Tadbirkorlar xiyoboni ochildi

Namangan viloyatining Chortoq tumanida Tadbirkorlar xiyoboni foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.

Mazkur xiyobon tadbirkorlar va ishbilarmonlik ishtiyoqidagi yoshlarga mo‘ljallangan bo‘lib, ularni rag‘batlantirish uchun bir qator qulayliklar va imkoniyatlar yaratilgan.

Bu yerda investorlar bilan biznes-loyihalarni muhokama qilish, tadbirkorlarning bevosita muloqotlarini tashkil etish uchun xonalar ajratilib, shinam mebel va orgtexnika bilan jihozlandi.

Shuningdek, xiyobonda tadbirkorlarning ishlashi, aloqa o‘rnatishi va fikr almashishi uchun zarur muhitni taʼminlovchi zamonaviy kovorking maydonlari ham mavjud.

Xiyobonning ochilish marosimida tuman hokimligi, Savdo-sanoat palatasi mutasaddilari, tadbirkorlik subyektlari vakillari ishtirok etdi.