Ostonada O‘zbekistonda qotillik uchun qidiruvda bo‘lgan jinoyatchi qo‘lga olindi, deb xabar bermoqda Tengrinews poytaxt politsiya departamenti matbuot xizmatiga tayanib.
20—21-sentyabr kunlari Qozog‘iston poytaxti hududida keng ko‘lamli Operativ-qidiruv tadbirlari o‘tkazildi. Olib borilgan tezkor tadbirning birinchi kunida ichki ishlar organlari xodimlari tomonidan yetti nafar jinoyatchi aniqlanib, qo‘lga olindi, bedarak yo‘qolgan ikki fuqaroning manzili aniqlandi.
“Xususan, poytaxt IIB xodimlari davlatlararo qidiruvda bo‘lgan 31 yoshli O‘zbekiston Respublikasi fuqarosini aniqladi. U 2019-yilda Namangan viloyatida qotillik sodir etganidan keyin Qozog‘iston hududiga kelib yashiringan. Erkak Ostona politsiya departamentining vaqtinchalik hibsxonasiga olib ketildi”, — deyiladi xabarda.
Ayni paytda Minsk konvensiyasiga muvofiq jinoyatchini ekstraditsiya qilish masalasi hal etilmoqda.
Avvalroq Qozog‘istonning Qarag‘anda viloyatida odam savdosi uchun qidiruvga berilgan O‘zbekiston fuqarosi qo‘lga olingandi.
Izoh (0)